ՀԾԿՀ-ն վերանայում է ջերմային կայանների և էներգետիկ ընկերությունների օգտագործած գազի գինը․ բնակչության համար սակագինը չի փոխվի

Հանրային ծառայությունները կարգավորող հանձնաժողովը հերթական անգամ վերանայում է բնական գազի սակագները։ Հանձնաժողովն արդեն հրապարակել է առաջարկվող փոփոխությունների փաթեթը գազամատակարարման համակարգի, էլեկտրաէներգետիկ ոլորտի և մի շարք արտադրող ընկերությունների սակագնային հաշվարկների վերաբերյալ։

«Բնական գազի մյուս բոլոր սպառողների, այդ թվում՝ բնակչության համար սակագները մնում են անփոփոխ»։

Բնակչության համար բնական գազի սակագինը չի փոխվի։ Հանրային ծառայությունները կարգավորող հանձնաժողովը վերանայել է «Գազպրոմ Արմենիա»-ի և «Տրանսգազ»-ի սակագները։ Հանձնաժողովի սակագնային քաղաքականության վարչության պետ Աշոտ Ուլիխանյանը նշում է, որ ինչպես ամեն տարի այս անգամ ևս հաշվարկները կատարել են՝ հաշվի առնելով տնտեսական բոլոր փոփոխությունները։ Թարմացվել են հաշվարկներում կիրառվող հիմնական տվյալները՝ դոլարի փոխարժեքը, բնական գազի սպառման կանխատեսվող ծավալը, նորոգման և նյութական ծախսերը, ինչպես նաև վերջին մեկ տարվա ներդրումները։

«Առաջարկվող սակագների հաշվարկներ ներառվել են 2025 թվականին և 2026 թվականի առաջին եռամսյակին կատարված շուրջ 18,6 մլրդ դրամի ներդրումները»։

Հանձնաժողովը հաշվի է առել Երևանում նոր գազային հզորությունների միացման վճարներից ստացված շուրջ 1 մլրդ 300 մլն դրամ լրացուցիչ եկամուտը։ Ըստ հաշվարկների՝ այդ գումարը նվազեցրել է սակագին ներառվող անհրաժեշտ հասույթը։

Միաժամանակ նախատեսվում է ավելացնել գազամատակարարման համակարգում աշխատող մասնագետների աշխատավարձերը։ Հանձնաժողովում նշում են, որ դա  լիցենզավորված աշխատակիցների համար է և չի վերաբերում բարձրագույն ղեկավար կազմին։

«Աշխատանքի վճարման գծով ծախսերի ավելացումը նախատեսվում է ուղղել գազամատակարարման համակարգի լիցենզավորված գործունեության մեջ ներգրավված աշխատողների, բացառությամբ բարձրաստիճան ղեկավար կազմի, պարգևատրման ֆոնդին»։

Սակայն «Գազպրոմ Արմենիա»–ն ցանկացած ժամանակ կարող է դիմել սակագնի վերանայման հայտով։ Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը վստահեցրեց, որ այս որոշմամբ բնական գազի գործող սակագինը կպահպանվի մինչև այս տարվա վերջը։ 2027 թվականի հունվարի 1-ից «Գազպրոմ Արմենիա»–ն կարող է նոր հայտ ներկայացնել սակագնի վերանայման համար։ Այդ դեպքում հանձնաժողովը կուսումնասիրի հիմնավորումներն ու կորոշի՝ կա սակագնի փոփոխության անհրաժեշտություն, թե ոչ։

«Եթե օբյեկտիվ լինեն պատճառները, և իսկապես լինեն այնպիսի խնդիրներ, որ անհրաժեշտ լինի վերանայելու սակագինը, հանձնաժողովը կքննարկի ներկայացված հայտը և որոշում կընդունի դրա հիման վրա»։

Անփոփոխ է մնում նաև «Հայաստանի էլեկտրական ցանցերի»՝ սպառողներին վաճառած էլեկտրաէներգիայի սակագինը։ Վերանայվում են Երևանի ՋԷԿ-ի, «Արփա-Սևան» ընկերության, «Գազպրոմ Արմենիա»-ի, Հրազդան-5 էներգաբլոկի, Հայկական ատոմային էլեկտրակայանի և «Կոնտուր գլոբալ հիդրո կասկադ»-ի էլեկտրաէներգիայի սակագները։

«Կատարված հաշվարկների համաձայն՝ բարձրանում են Հայկական ատոմային էլեկտրակայանից առաքվող էլեկտրական էներգիայի սակագինը և «Կոնտուր գլոբալ հիդրո կասկադ» ընկերության հզորության վճարը, իսկ Երևանի ՋԷԿ-ից, «Արփա-Սևան»-ից և Հրազդան-5 կայանից առաքվող էլեկտրական էներգիայի սակագները նվազում են»։

Հանձնաժողովն առաջարկում է նաև նվազեցնել բնական գազի փոխադրման, օպերատիվ ծառայության և բաշխման սակագները։ Միաժամանակ օգոստոսի 1-ից կփոխվի խոշոր՝ 30 Մվտ և ավելի հզորությամբ ջերմային էլեկտրակայաններին մատակարարվող բնական գազի սակագինը։ Կվերանայվեն նաև էլեկտրաէներգիայի առաքման ծավալներն ու մի շարք արտադրողների համար գործող սակագները։

armradio.am