Ընտրակաշառքի համար պատիժը կխստացվի, դատապարտվածներին կարգելվի զբաղեցնել պետական պաշտոններ

ՀՀ ԱԺ պատգամավորներ Ալեն Սիմոնյանը, Արուսյակ Ջուլհակյանը, Վահագն Ալեքսանյանը, Ալխաս Ղազարյանը և Թագուհի Ղազարյանը հեղինակել են օրենսդրական նախագիծ, որը միտված է ընտրակաշառքի դեմ պայքարի արդյունավետության բարձրացմանը: «ՀՀ քրեական օրենսգրքում փոփոխություններ կատարելու մասին» օրենքի նախագիծը՝ կից փաթեթով քննարկվել է հուլիսի 1-ին ԱԺ պետական-իրավական հարցերի մշտական հանձնաժողովի արտահերթ նիստում:

Հիմնական զեկուցող Վահագն Ալեքսանյանի խոսքով օրեսդրական փաթեթով առաջարկվում է խստացնել ընտրակաշառք տալու, ստանալու և դրան միջնորդելու համար նախատեսված պատժաչափերը, ինչպես նաև սահմանել խիստ մասնագիտական արգելքներ նման հանցագործություն կատարած անձանց համար:

Ըստ զեկուցողի՝ ընտրակաշառքը շարունակում է մնալ ժողովրդավարական համակարգի գլխավոր սպառնալիքներից մեկը, քանի որ այն խաթարում է քաղաքացիների ազատ կամարտահայտությունը և նվազեցնում հանրային վստահությունն ընտրական գործընթացների նկատմամբ:

Նախագծով նախատեսվում է Քրեական օրենսգրքի 218-րդ և 221-րդ հոդվածներով նախատեսված արարքների համար պատիժներն էականորեն խստացնել՝ ապահովելով հանցագործությունների կանխարգելման լրացուցիչ մեխանիզմներ: Միաժամանակ, նախագծի համաձայն՝ ընտրակաշառքի համար դատապարտված անձինք կզրկվեն պետական և համայնքային ծառայության, վարչական կամ հայեցողական պաշտոններ զբաղեցնելու իրավունքից: Սահմանափակումը գործելու է անկախ դատվածության մարված կամ վերացված լինելու հանգամանքից:

Նշվել է, որ պետական և համայնքային պաշտոններ զբաղեցնող անձինք իրականացնում են հանրային իշխանության գործառույթներ, ուստի նրանց նկատմամբ պետք է կիրառվեն բարեվարքության, ազնվության և հանրային վստահության բարձր չափանիշներ: Ընդգծվել է, որ սահմանափակումները նպատակ ունեն պաշտպանել հանրային ծառայության հեղինակությունը և ապահովել կառավարման համակարգի նկատմամբ հանրության վստահությունը: Փոփոխությունները միտված են վերջ դնելու կոռուպցիոն այն մեխանիզմներին, որոնք տարիներ շարունակ խոչընդոտել են Հայաստանում արդար և թափանցիկ ընտրությունների անցկացմանը:

Հարակից զեկուցող, Պետական-իրավական հարցերի մշտական հանձնաժողովի անդամ Ալխաս Ղազարյանը, կարևորելով օրենսդրական փաթեթի ընդունումը, հորդորել է գործըներներին նախաձեռնությանը տալ դրական եզրակացություն:

Օրենսդրական փաթեթի վերաբերյալ Կառավարության դրական դիրքորոշումն ու առաջարկները ներկայացրել է ՀՀ արդարադատության նախարարի տեղակալ Գևորգ Քոչարյանը:

Կառավարության առաջարկներով լրամշակված օրենսդրական փաթեթը ստացել է դրական եզրակացություն: