ԱՄՆ-ը կանոնավոր զորքեր է ուղարկել Վենեսուելա. նրան առաջինն օգնության հասան հակառակորդ երկրները

ԱՄՆ ԶՈւ Հարավային հրամանատարությունը երկրաշարժից տուժած Վենեսուելա է ուղարկել «զգալի ուժեր»՝ օգնություն ցուցաբերելու համար։ Հրամանատարության հաղորդագրության մեջ նշվում է, որ Վենեսուելան պաշտոնապես դիմել է ԱՄՆ-ին օգնության խնդրանքով։

Վենեսուելա են ուղարկվել USS Fort Lauderdale (LPD 28) դեսանտային տրանսպորտային եւ USS Billings (LCS 15) առափնյա մարտական նավերը։ Ներվրավվել են նաեւ C-17 Globemaster եւ C-130 Hercules ռազմատրանսպորտային ինքնաթիռներ եւ ուղղաթիռներ։

ԱՄՆ պետքարտուղարությունը հայտարարել է, որ Վենեսուելայում աղետից հետեւանքների վերացման համար հատկացվել է 150 մլն դոլար։

Չորեքշաբթի օրը տեղի ունեցած բնական աղետի հետեւանքով զոհերի թիվը շարունակում է աճել` էլ ավելի մեծ անորոշության մեջ գցելով լատինաամերիկյան այս երկիրը։

Այս տարվա հունվարին ԱՄՆ-ը առեւանգեց 2013 թվականից Վենեսուելան ղեկավարող Նիկոլաս Մադուրոյին, որն այժմ Նյու Յորքում կանգնած է դատարանի առջեւ թմրանյութերի ապօրինի շրջանառությանը մասնակցության մեղադրանքով։

Դրանից հետո երկիրը ղեկավարում է նրա մերձավոր դաշնակից, նախկին փոխնախագահ Դելսի Ռոդրիգեսը։

Երկրաշարժից ավելի քան երկու ժամ հետո նա դիմել է ժողովրդին պետական VTV հեռուստաալիքով։ Մինչ այդ` աղետի հետեւանքների մասին շատ աղքատիկ տեղեկություններ կային։ Դա մասամբ պայմանավորված էր նրանով, որ ամենաշատ տուժած որոշ շրջանների հետ կապը խափանվել էր։ Պատճառներից մեկը նաեւ երկրում անկախ լրատվամիջոցների նկատմամբ Մադուրոյի սահմանած սահմանափակումներն էին, ինչի պատճառով նաեւ լրագրողները օպերատիվ կերպով իրադարձությունների կենտրոնում չէին։

Հեռուստաուղերձի ժամանակ Ռոդրիգեսի կողքին էին նրա եղբայրը՝ խորհրդարանի ղեկավար Խորխե Ռոդրիգեսը, ինչպես նաեւ ներքին գործերի նախարար Դիոսդադո Կաբելյոն՝ Մադուրոյի եւս մեկ ազդեցիկ դաշնակիցներից մեկը։

Իր ելույթում Ռոդրիգեսը նախեւառաջ վենեսուելացիներին միավորվելու կոչ է արել, ինչը հասկանալի է։ Ավելի քան տասը տարի հասարակությունը լրջորեն պառակտված է Մադուրոյի ու նրա հակառակորդների միջեւ։

Այս պառակտվածության, ինչպես նաեւ արդեն տեւական ժամանակ ձգվող տնտեսական ճգնաժամի բերած խնդիրները գիտակցելով` երկրի նախագահի պաշտոնակատար Դելսի Ռոդրիգեսն առանձին շնորհակալություն է հայտնել աղետի հետեւանքների վերացման հարցում օգնություն առաջարկած օտարերկրյա կառավարություններին։

Նա հատկապես առանձնացրել է ԱՄՆ-ի նախագահ Դոնալդ Թրամփին եւ նրա վարչակազմին, որոնք, նրա խոսքով, «մշտական կապի մեջ են Վենեսուելայի իշխանությունների հետ՝ առաջարկելով աջակցություն եւ արտահայտելով համերաշխություն»։

Ռոդրիգեսը նաեւ հայտնել է, որ բանակցություններ է վարել Դոմինիկյան Հանրապետության եւ Սալվադորի նախագահների հետ, ինչպես նաեւ շնորհակալություն հայտնել Չիլիի նախագահին։

Հետաքրքիրն այն է, որ այսօր Վենեսուելային առաջնահերթ օգնություն հասցնող այս պետությունները ղեկավարում են Մադուրոյի եւ նրա կողմնակիցների գաղափարական հակառակորդները։