Անսպասելի շրջադարձ Պոլսի պատրիարքի ընտրություններում. Գարեգին Բ. կաթողիկոսը Աթեշյանին կանչել է Հայաստան
Պոլսո Հայոց պատրիարքարանի շուրջ կրքերը չեն դադարում բորբոքվել. Գարեգին Բ. Ամենայն Հայոց Կաթողիկոսը պատրիարքի ընտրության հետ կապված ճգնաժամային իրավիճակը պարզելու և համապատասխան որոշում կայացնելու համար Հայաստան է հրավիրել Պոլսի Հայոց պատրիարքի փոխանորդ Արամ արքեպիսկոպոս Աթեշյանին և եկեղեցական խորհրդի նախագահ Սահակ արքեպիսկոպոս Մաշալյանին:
Ինչպես տեղեկացնում է «Ակօսը», Ամենայն Հայոց կաթողիկոսը նաև առկախել է երեկ տեղի ունեցած արտակարգ ժողովի որոշումը համարել է կանոնակարգի խախտում:
Նախօրեին գումարված արտակարգ ժողովում որոշում է կայացվել նոր պատրիարքի ընտրությունները անցկացնել մայիսի 28-ին, ընդ որում`ընտրությունների անցկացման համար համայնքը չի պատրաստվում սպասել Թուրքիայի նախագահ Ռեջեփ Թայիփ Էրդողանի միջամտությանը:
Հիշեցնենք, որ եկեղեցական խորհրդի նախագահ, արքեպիսկոպոս Սահակ Մաշալյանի կողմից Արամ Աթեշյանի հասցեին հնչած մեղադրանքներն ու Մաշալյանի հրաժարականի հայտարարությունը սկիզբ դրեց նոր ճգնաժամային իրավիճակի, որի արդյունքում համայնքի ներկայացուցիչները արտահերթ ժողով գումարեցին:
Մաշալյանը, մասնավորապես, հայտարարել էր, որ փոխպատրիարքի աթոռին Աթեշյանը շարունակում է մնալ «մանիպուլյացիայի, սպառնալիքների և փոխպատրիարքի իրավասությունները սեփական շահերին ծառայեցնելու միջոցով»:
Սահակ Մաշալյանի հրաժարականի հայտարարության և պատրիարքի փոխանորդ Արամ Աթեշյանին ուղղված մեղադրանքների առիթով հրավիրված ժողովի ընթացքում, մասնավորապես, որոշվել էր.
Փետրվարի 17-ին եկեղեցական խորհուրդը պետք է ընտրեր պատրիարքի պաշտոնական տեղապահ:
Տեղապահը փետրվարի 18-ին, օգտագործելով իրեն տրված իրավասությունները, պետք է գումարեր եկեղեցական խորհրդի ժողով, ընտրվում է պատրիարքի ընտրությունների հարցով հատուկ 15 հոգանոց հանձնաժողովը:
Փետրվարի 20-ին հանձանաժողովը վերջնական տեսքի էր բերելու ընտրությունների անցկացման մասին Ստամբուլի նահանգապետարանին ներկայացվելիք նամակը:
Պատրիարքի փոխանորդ Արամ Աթեշյանը մինչև մայիսի 28 կմնա փոխպատրիարքի պաշտոնում, սակայն իրավասություն չի ունենա ընտրական գործընթացին միջամտելու:
Ներկայում կայացած ժողովի ընթացքում ընդունված բոլոր որոշումները համարվում են ժամանակավորապես առկախված:
Հիշեցնենք, որ դեռևս հոկտեմբերին Պոլսո Հայոց պատրիարքարանը հայտարարել է ներկայիս պատրիարք Մեսրոպ Մութաֆյանին պաշտոնանկ անելու և պատրիարքի նոր ընտրություններ անցկացնելու որոշման մասին: Ընտրությունների ամսաթվի նշանակումը պարբերաբար ձգձգվում էր հանրության համար անհայտ պատճառներով:
Նշենք, որ պատրիարք Մութաֆյանը կոմայի մեջ է գտնվում 2008թ.-ից և փաստացի չի գործում որպես պատրիարք: Նրա փոխարեն այդ լիազորությունները կատարում է արքեպիսկոպոս Արամ Աթեշյանը, որն ընտրված է ոչ թե համայնքի, այլ պետության կողմից:
Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշումը՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի: