«Ապահովագրությունը չպետք է գործի բժշկի հաշվին»․ մի խումբ բուժաշխատողներ բողոքում են աշխատավարձերի հաշվարկից
Մի խումբ բուժաշխատողներ այսօր հավաքվել են Ազգային ժողովի շենքի մոտ և դիմում-նամակ փոխանցել օրենսդիրներին։ Նրանք պահանջել են հանրային լսումներ հրավիրել քննարկելու առողջության ապահովագրության համակարգի ներդրումից հետո ի հայտ եկած խնդիրները։ Բուժաշխատողները դժգոհել են հատկապես աշխատավարձի հաշվարկման մեխանիզմներից, որոնք, ըստ նրանց, որոշ մասնագիտացումներում էականորեն նվազել են։
«Այո՛, ես իմ օրինակով տեսել եմ ցածր վարձատրություն»։
Սոնոգրաֆիստ Կարինա Աղալարյանը պնդում է՝ համընդհանուր առողջության ապահովագրության համակարգի գործարկումից հետո բժիշկների մի մասի աշխատավարձը նվազել է։ Բուժառուները համակարգից գոհ են, իսկ բժիշկները, որոնք փաստացի ապահովում են համակարգի գործարկումն ու իրականացումը, դժգոհում են անհամաչափ և անբավարար վարձատրությունից՝ ասում է Աղալարյանը։
«Այդ պատճառով կարևոր է, որ հենց սկզբնական փուլում առկա խնդիրները բարձրաձայնվեն»։
Ուրոլոգ Գևորգ Գրիգորյանի գնահատմամբ՝ գործող հաշվարկային մեխանիզմները ձևավորված են այնպես, որ հստակ չեն սահմանում՝ վճարված գումարները վերաբերում են ամբողջ աշխատավարձի՞ն, թե՞ ոչ ամբողջական ծավալին։ Կարծում է, որ անհրաժեշտ է ավելի թափանցիկ և հստակ մեթոդաբանություն, որպեսզի բուժաշխատողները հասկանան իրենց վարձատրության իրական կառուցվածքը։
«Եկեք օբյեկտիվ խոսենք, պոլիկլինիկա դուք մտե՞լ եք։ Մի հատ խնդրում եմ` գնացեք պոլիկլինիկայի հերթերը տեսեք ու տեսեք, որ բուժաշխատողը կարող է ամբողջ էդ հերթը սպասարկել ու վերջում 19000 դրամ ստանալ ու էդ հերթը, որ դուք մտնեք, տեսնեք, դա մեկանգամյա հերթ է, բայց ամեն օր է այդպիսի հերթ»։
Խնդիրը, ըստ մասնագետների, ոչ միայն աշխատավարձին է վերաբերում, այլև կազմակերպական խնդիրներին։ Դրանք ազդում են թե՛ բժիշկների աշխատանքի արդյունավետության, թե՛ հիվանդների սպասարկման որակի վրա՝ ասում է ուրոլոգ Գևորգ Գրիգորյանը։
«Մենք ուզում ենք, որ ապահովագրական համակարգը գործի, բայց գործի արդյունավետ և հավասարակշռված։ Կարևոր է, որ այդ գործընթացում չոտնահարվեն բուժաշխատողների շահերը, որովհետև բուժաշխատողներն էլ ունեն սոցիալական պարտավորություններ։ Մենք դեմ չենք ապահովագրական համակարգին։ Ընդհակառակը՝ համոզված ենք, որ այն կարող է լուծել մեր երկրի բնակիչների բազմաթիվ խնդիրներ։ Սակայն այդ հարցը պետք է լուծվի պետության կողմից և համակարգային ձևով, ոչ թե բուժաշխատողների հաշվին։ Բուժաշխատողին կոպեկներ վարձատրելով տուժելու է առողջապահության, բուժօգնության որակը, ինչից տուժելու է բուժառուն»։
Բուժաշխատողներն օրենսդիրներին դիմում–նամակ են փոխանցել՝ թեմայով լսումներ կազմակերպելու խնդրանքով։ «Առողջության իրավունք» ՀԿ-ի նախագահ Անուշ Պողոսյան
«Ամենամեծ ակնկալիքը մասնագիտական հանրույթի, ոչ միայն իմ կողմից այն է, որ նստեն մեկ սեղանի շուրջ ևգույքագրեն ամբողջ այս ժամանակահատվածում ի հայտ եկած խնդիրները, և այդ խնդիրների արդյունքները վերլուծելով կատարել շտկումներ, որովհետև, եթե այս կարևորագույն ռեֆորմը գնա տապալման, ապա դա լուրջ խնդիր է երկրի սոցիալ–տնտեսական ոլորտներում»։
Առողջապահության նախարարությունը խնդրին դեռ չի արձագանքել, գերատեսչությունը սակայն, օրերս պարզաբանել էր պոլիկլինիկական օղակի բուժաշխատողներն վճարման կարգը։ Նրանք աշխատավարձը ստանում են երկու կտորով` պետական պատվերով իրականացված ծառայություների և արդեն Առողջության համընդհանուր ապահովագրության ծառայությունների դիմաց:
«Հաշվի առնելով, որ ապահովագրության համակարգի մեկնարկային առաջին ամիսն է, նոր համակարգով փոխհատուցումներ իրականացնելու համար բուժկենտրոններին տրվել էր լրացուցիչ ժամանակ կատարողականներում նոր ներդրված ծառայությունների մուտքագրումների, ճշգրտումների համար»,–ասվում էր նախարարության հաղորդագրության մեջ։
Առողջապահության նախարար Անահիտ Ավանեսյանը բուժաշխատողների աշխատավարձերին անդրադարձել էր տարեկան ամփոփիչ ասուլիսի ընթացքում։
Ապահովագրության և պետական պատվերի շրջանակում պետությունը հայտարարում է, որ պատրաստ է տվյալ ծառայությունը ձեռք բերել կոնկրետ նկարագրով և սահմանված փոխհատուցման գնով։ Բժշկական կենտրոնը, պայմանագիր ստորագրելով, ընդունում է այդ պայմանները և պարտավորվում է քաղաքացիներին մատուցել համապատասխան ծառայությունը։ Պետությունն էլ վճարում է հենց այն գումարը, որի շուրջ կողմերը պայմանավորվել են պայմանագիրը կնքելիս։
«Մենք պայմանագրի առարկա հանդիսացող ծառայության գնի մեջ որևէ մի աշխատավարձ չենք ֆիքսում։ Ես խնդրում եմ` մի փնտրեք մի բան, որը չկա»։
Նախարարի հրամանով բժիշկների աշխատավարձեր չեն սահմանվում՝ ասել էր Ավանեսյանը։ Դրանք կարգավորվում են գործատու–աշխատող հարաբերություններով՝ բժշկական կենտրոնի և բուժաշխատողի միջև։ Միևնույն ժամանակ, գերատեսչության ղեկավարն արձանագրել էր, որ ծառայության գնի հաշվարկի մեթոդաբանության մեջ նախատեսվում է նվազագույն շեմ, որը բժշկական կենտրոնը պետք է ուղղի բուժանձնակազմի փոխհատուցմանը։
«Եվ նախկինում էլ մեր սահմանված այդ առնվազնի շեմից բարձր բժշկական կենտրոնները վճարում էին բժիշկներին, որոշներին շատ ավելի բարձր, որոշներին այդ չափով, որոշներին էլ մի փոքր ավելի բարձր»։
Բուժաշխատողների աշխատավարձերը ձևավորվում են ապահովագրական դեպքերի համար սահմանված սակագներից։ Եթե դրանք և համապատասխան ծառայությունների արժեքները չվերանայվեն և չհամապատասխանեցվեն իրական ծախսերին, ապա բուժաշխատողների վարձատրությունը ժամանակի ընթացքում ավելի ու ավելի խնդրահարույց կդառնա՝ բարձրաձայնում են Ազգային ժողովի դիմաց հավաքված բուժաշխատողները։
radiolur
Ես «Հայփոստի» վերջին առնվազն 10 տարվա ամենացածր աշխատավարձ և պարգևատրում ստացած տնօրենն եմ. Հայկ Կոն...
ՀՀ Կառավարության կազմը
DAF մակնիշի բեռնատարը բախվել է հողաթմբին
Քնած մարդկանց առավոտվա ժամը 06.00-ին դուբինկեքով սատկացնելը համարում եք նորմալ, սա խնդիր է. Ռուբինյա...
Հուլիսը եղել է BYD-ի ամենահաջող ամիսը
Վարչապետ Փաշինյանը երկօրյա աշխատանքային այցով մեկնել է Ղրղզստան
Որքան է կազմում ՀՀ մշտական բնակչությունը
Կասեցվել է «ՆՆ Հոլդինգ»-ին պատկանող հացի և տորթերի արտադրամասի գործունեությունը
Չժաո Լեցզին շնորհավորել է Ռուբեն Ռուբինյանին ԱԺ նախագահ ընտրվելու կապակցությամբ
Արիանա Գրանդեն որոշել է ժամանակավորապես հեռանալ հանրային տեսադաշտից