Մի շարք երկրներ քննադատել են Արևմտյան ափում Իսրայելի գործողությունները

Կատարի, Հորդանանի, Արաբական Միացյալ Էմիրությունների, Ինդոնեզիայի, Պակիստանի, Թուրքիայի, Սաուդյան Արաբիայի և Եգիպտոսի արտաքին գործերի նախարարները հանդես են եկել համատեղ հայտարարությամբ, դատապարտել Արևմտյան ափի տարածքների «պետական գրանցման» մասին Իսրայելի որոշումը: Հրեական պետությունը նաև ցանկանում է այդ տարածքներում հողային սեփականության իրավունքի գրանցման ընթացակարգեր հաստատել։

Արտգործնախարարների հայտարարության մեջ նշվում է՝ նման քաղաքականությունը վտանգավոր էսկալացիա է, որը կհանգեցնի լարվածության և անկայունության աճի ինչպես Պաղեստինի տարածքում, այնպես էլ ամբողջ տարածաշրջանում. կամրապնդի Իսրայելի հսկողությունը և պաղեստինյան օկուպացված հողերի նկատմամբ անօրինական ինքնիշխանությունը:

Արաբական և իսլամական երկրների դիվանագետները կոչ են արել միջազգային հանրությանը՝ պատասխանատվություն ստանձնել և հստակ ու վճռական քայլեր ձեռնարկել Իսրայելի անօրինական գործողությունները խոչընդոտելու համար, ինչպես նաև թույլ չտալու, որ տարածաշրջանում խաղաղության ջանքերը ձախողվեն:

Իսրայելի որոշումը դատապարտել է նաև Եվրամիությունը: