Երուսաղեմի հայերը հերթապահում են «Կովերի պարտեզ»-ի մոտ․ հույս ունեն՝ խնդիրը կունենա հաջող ելք

Երուսաղեմի հայությունը հույս ունի, որ քաղաքի հայկական թաղամասի «Կովերի պարտեզ» տարածքի հարցը հաջող ելք կունենա։ Երուսաղեմի հայոց պատրիարքությունն ու միաբանությունը հայ համայնքի հետ ակտիվորեն աշխատում են՝ պահպանելու եկեղեցապատկան հողը։

Երուսաղեմի հայկական թաղամասի «Կովերի պարտեզ» կոչվող եկեղեցապատկան հողերի տարածքի առնչությամբ այսօր փաստահավաք աշխատանք է իրականացվում: Հարցով զբաղվելու նպատակով ձևավորված հանձնախմբի անդամ, Երուսաղեմի հայոց պատրիարքության Սրբոց Հակոբյանց միաբանության անդամ և Սուրբ Հարության տաճարում հայ եկեղեցու ներկայացուցիչ Տեր Տիրան վարդապետ Հակոբյանն ասում է՝ խնդրահարույց իրավիճակը հարթելուն ուղղված աշխատանքները մշտական բնույթ են կրում․ 

«Իրավական առումով որոշ ճշգրտությունների, վերանայումների փուլում ենք: Հարցը բավական խրթին է, լուրջ և բազմակողմանի, այսինքն միայն ուղղակի երկու խմբերի կամ երկու կողմերի միջև չէ»:

Արդեն մի քանի տարի է՝ Երուսաղեմի հայկական թաղամասի «Կովերի պարտեզ» կալվածքը դարձել է կռվախնձոր։

Պարտեզն 99 տարով վարձակալած իսրայելական ընկերությունը պարբերաբար ոստիկանների ուղեկցությամբ փորձում է մուտք գործել տարածք, ինչը հայ համայնքի ներկայացուցիչները, սակայն, թույլ չեն տալիս՝ պայքարելով այն հայկական պահելու համար։

«Կովերի պարտեզը» պետք է անցներ իսրայելական կողմին վիճահարույց պայմանագրով, որը կնքվել էր Երուսաղեմի Հայոց պատրիարքարանի հետ, սակայն հայկական կողմը հետագայում ամբողջությամբ չեղյալ էր հայտարարել այն՝ դիմելով դատարան։

Երուսաղեմի Հայոց պատրիարքը նշել է, որ ինքն այդ պայմանագրից տեղյակ չի եղել, դրա կնքման համար մեղադրում է արդեն կարգալույծ արված միաբաններից մեկին։

Հանձնախմբի անդամ Տեր Տիրան վարդապետ Հակոբյանն ասում է՝ հարցը տեղի հայության, ինչպես նաև պատրիարքության վերջին շրջանի ամենացավոտ հարցերից է, որի լուծմանն այսօր բոլորը միասին են լծվել․  

«Հաշվի անելով, որ ես հարցով զբաղվող հանձնախմբում եմ, շատ բան չեմ կարող ասել, բայց մի բան կարող եմ նշել, որ մեր պատրիարքությունը, հայությունը, բոլոր նրանք, ովքեր իսկապես սրտացավ են սուրբ հողում մեր ներկայության ամրապնդմամբ, ամեն ինչ անում են որպեսզի տարածքը վերադարձվի: Տարբեր ճանապարհներ կան՝ հատկապես իրավական»։

«Կովերի պարտեզ»-ը  պատմական Սիոն լեռան վրա է՝ Երուսաղեմի հայկական թաղամասի հարավարևմտյան անկյունում: Այն զբաղեցնում է հայկական թաղամասի մոտ 25 տոկոսը, տեղի հայության համար կարևոր նշանակություն ունի։  

«Հարցը բազմաշերտ է։ Բայց մի բան վստահ կարող եմ ասել, որ մենք՝ մեր պատրիարքությունը և միաբանությունը, ջանք ու եռանդ չենք խնայում, որպեսզի հարցը հաղթական ելք ունենա։ Վերջին շրջանի միաբանական ժողովի որոշումը կընդգծեմ՝ կրկին վերջնականապես ստորագրված այդ համաձայնագրի չեղարկմանը գնալ։ Հիմա հիմնական աշխատանքն այդ ուղղությամբ է։ Սակայն, ինչպես ասացի՝ հարցը բազմաշերտ է՝ տարբեր միջոցներ կան, որոնք փորձում ենք կիրառել, որպեսզի դրական ելք ունենանք»։

Մինչ հարցը քննարկման փուլում է, տեղի հայությունը հերթապահություն է իրականացնում Երուսաղեմի հայկական թաղամասի «Կովերի պարտեզ»-ում։ 

radiolur