ՀԱՊԿ-ի մեր մասնակցությունը լրջագույն խոչընդոտ էր միջազգային շուկային հասանելիություն ունենալու համար. Նիկոլ Փաշինյան

Պարզվեց, որ շատ դեպքերում կարիք չկա, որ մենք գնանք ու դռներ ծեծենք: Պաշտպանական սպառազինության ամբողջ գլոբալ շուկան Հայաստանի Հանրապետության առաջ բացվեց: Չեմ ուզում թաքցնեմ, այդտեղ կա երկրորդ նյուանսը՝ որը կապված էր ՀԱՊԿ-ի հետ: ՀԱՊԿ-ի մեր մասնակցությունը լրջագույն խոչընդոտ էր միջազգային շուկային հասանելիություն ունենալու համար: Այս մասին ասել է ՀՀ վարչապետ Նիկոլ Փաշինյանը՝ «Հայաստանը և խաղաղությունը ռիսկերի խաչմերուկում» խորագրով քննարկման ժամանակ:

Անդրադառնալով Եվրամիության անդամ դառնալուն՝ Փաշինյանը շեշտեց, որ պետք է գնալ ՀՀ-ն Եվրամիության ստանդարտներին համապատասխանող երկիր դարձնելու ճանապարհով. «Նախորդ տարի էական էր Եվրամիության անդամագրվելու գործընթաց սկսելու մասին օրենքի ընդունումը, որը նշանակություն ունի մեր երկրի ինքնիշխանության ավելի բարձր մակարդակ ապահովելու տեսակետից: Արդյո՞ք մենք ուզում ենք լինել Եվրամիության լիիրավ անդամ՝ այո, աներկբա ու միանշանակ: Երկիրը պետք է համապատասխանի Եվրամիության ստանդարտներին: Հակառակ դեպքում խնդիր դնելը այդ պայմանի շրջանցմամբ դառնալ Եվրամիության անդամ՝ ժամանակի կորուստ է: Մեր ռազմավարությունը հետևյալն է՝ մենք ամուր ու հստակ պետք է գնանք ՀՀ-ն Եվրամիության ստանդարտներին համապատասխանող երկիր դարձնելու ճանապարհով»: