Ես իմ քայլն արել եմ և կրկնվելու դեպքում նորից կանեմ․ Միքայել Միքայելյանը՝ ադրբեջանական բողոքի մասին

«Ես իմ քայլն արել եմ և կրկնվելու դեպքում նորից կանեմ»,– «Փաստինֆո»-ի հետ զրույցում ասաց դահուկորդ Միքայել Միքայելյանը։

«Դա նրանց իրավունքն է․ կարող են որքան ուզեն և ինչքան ուզեն դիմեն։ Մեր դահուկային սպորտի ֆեդերացիայի մասով կարող եմ ասել, որ նրանք ամբողջությամբ իմ կողքին են և աջակցում են իմ այդ քայլին»,– նշեց Միքայելյանը։

Նրա խոսքով՝ ինքը տեղյակ է եղել, որ Ադրբեջանը հովանավոր է հանդիսանալու Աշխարհի գավաթի խաղարկությանը, սակայն չի իմացել, որ համապատասխան գրությունը հենց այդ օրը լինելու է մարզաշապիկի վրա։ Միքայելյանի փոխանցմամբ՝ մարզաշապիկը մարզիկներին տրամադրվում է մրցելույթից ընդամենը երկու ժամ առաջ, և առանց դրա մեկնարկի դուրս գալը թույլատրելի չէ։

«Դրանով են քեզ իդենտիֆիկացնում մրցելույթի ընթացքում որպես մարզիկ։ Երբ ստացանք մարզաշապիկը և տեսանք գրությունը, առանց երկմտելու փակեցինք ու գնացինք մեկնարկի»,– նշեց դահուկորդը։

Միքայել Միքայելյանը վստահեցրեց, որ տեղի ունեցածը որևէ հիմք չի կարող հանդիսանալ իր մարզական կարիերայի վրա ազդելու կամ իրեն որակազրկելու համար։