Էլեկտրական ավտոմեքենաների ներմուծման արտոնության ժամկետը կերկարաձգվի մինչև 2026թ դեկտեմբերի 31-ը

«Առաջարկվում է ավելացված արժեքի հարկից ազատման գործող արտոնությունը երկարաձգել ևս մեկ տարով՝ էլեկտրական շարժիչով մեծ, փոքր, միջին ավտոբուսների, մարդատար մեքենաների, մոտոցիկլետների, մոպեդների ներմուծման համար»,- ԱԺ տնտեսական հարցերի մշտական հանձնաժողովում ասաց էկոնոմիկայի նախարար Գևորգ Պապոյանը՝ ներկայացնելով Հայաստանի Հանրապետության հարկային օրենսգրքում լրացում կատարելու մասին օրենքի նախագիծն:

Նախարարը հիշեցրեց, որ էլեկտրական շարժիչով մեքենաներն այս պահին ազատված են ԱԱՀ-ից մինչև 2026թ հունվարի 1-ը:

Պապոյանը հիշեցրեց, որ Էլեկտրական տրանսպորտային միջոցների՝ երրորդ երկրներից ներմուծման համար ներկայումս գործում է նաև մաքսատուրքից ազատման արտոնություն:

Ըստ նախարարի՝ ԱԱՀ-ի և մաքսատուրքերի վճարման ազատման արդյունքում աճել է էլեկտրական շարժիչով տրանսպորտային միջոցների ներմուծման ծավալները:

«2023թ.-ին ներմուծման ծավալը կազմել է 9635, ինչը 2022թ.-ի համեմատ աճել է 75 %-ով, 2024թ.-ին ներմուծման ծավալը կազմել է 11 հազար 793, ինչը 2023-ի համեմատ աճել է 22 %-ով: Իսկ 2019թ համեմատ ներմուծման աճը 2024-ին եղել է շուրջ 17.6 անգամ... Այս տարեսկզբից մինչև նոյեմբերի 19-ը ՀՀ արդեն իսկ ներմուծվել է էլեկտրական շարժիչով 7 ավտոբուս, 16 հազար 381 ավտոմեքենա և 2479 մոպեդ: Կանխատեսվում է նախորդ տարվա համեմատ 2 անգամ ավելի շատ էլեկտրական մեքենա կներմուծվի»,- ասաց Պապոյանը:

Նախարարը հայտնեց , որ արտոնությունը տարածվում է միայն այն էլեկտրական շարժիչով տրանսպորտային միջոցների վրա, որոնք թողարկվել են 2023թ դեկտեմբերի 31-ից հետո՝ այսինքն՝ 2024, 2025թ, 2026թ արտադրության ավտոմեքենաների համար:

Էլեկտրական ավտոմեքենաների ներմուծման արտոնության ժամկետը կերկարաձգվի մինչև 2026թ դեկտեմբերի 31-ը

Վերջին 7 օրվաԹոփ լուրեր Թոփ 10ամենաընթերցվածէջերը

Վերջին 7 օրվա
Թոփ լուրեր Թոփ 10
ամենաընթերցված
էջերը