«Հայանտառ» ՊՈԱԿ-ը գյուղնախարարությունից տեղափոխվեց բնապահպանության նախարարություն
«Հայ անտառ» ՊՈԱԿ-ը կդառնա կոմիտե եւ կտեղափոխվի Բնապահպանության նախարարության ենթակայության տակ: Այս մասին որշում է կայացրել ՀՀ կառավարությունն իր այսօրվա՝ նոյեմբերի 30-ի նիստում:
ՀՀ գյուղատնտեսության նախարար Իգնատի Առաքելյանը կառավարությանը ներկայացրեց Անտառային ոլորտի բարեփոխումների հայեցակարգին, ռազմավարությանը եւ միջոցառումների ցանկին հավանություն տալու մասին որոշման նախագիծը:
«Նախագծի ընդունումը պայմանավորված է անտառային ռեսուրսների վերականգնմամբ, անտառածածկի ավելացման, անտառների բնապահպանական, սոցիալական եւ տնտեսական գործունեության պահպանման եւ զարգացման անհրաժեշտությամբ», - ասաց նախարարը՝ հավելելով, որ հիմնական փոփոխությունը հետեւյալն է՝ «Հայանտառ» ՊՈԱԿ-ը վերակազմավորվում է որպես կոմիտե եւ տեղափոխվում Բնապահպանության նախարարության ենթակայության տակ: Ըստ Իգնատի Առաքելյանի՝ անտառները Հայաստանում ավելի շատ բնապահպանական դեր ունեն:
Վարչապետ Կարեն Կարապետյանը՝ դիմելով բնապահպանության նախարար Արծվիկ Մինասյանին, ասաց. «Հիմա, պարոն Մինասյան, մենք ակնկալում ենք Ձեզանից, որ Դուք շատ արագ պետք է բերեք ձեւակերպեք քվոտաներ, մենք դրա մասին խոսել ենք: Այն լիմիտները, որոնք տրամադրում ենք շատ ավելի ցածր է, քան շուկայում առկա քանակը, այդ իսկ պատճառով մենք այդ գործողությունները պետք է լեգալիզացնենք, այդ ռեսուսրները պետք է ուղղենք, որպեսզի անտառի պահպանման գնա»:
Նա նախարարին հարցրեց, թե որքան ժամանակ է պետք, որ այդ ամբողջը ֆորմալացվի, ինչին Արծվիկ Մինասյանը պատասխանեց, որ կաշխատեն գյուղնախարարության հետ եւ 10 օրվա ընթացքում կներկայացնեն արդյունքներ՝ 2018 թվականի չափաքանակների առումով: