Փոխնախարարը համակարգում է կոնկրետ ոլորտներ և ձախողում

Նախարարությանը մոտ կանգնած՝ «Ժողովուրդ» օրաթերթի աղբյուրների փոխանցմամբ՝ փոխնախարար Լենա Նանուշյանը տարիներ շարունակ կենտրոնացրել է կադրային լիազորությունները իր ձեռքում, իսկ նախարար Անահիտ Ավանեսյանը անգամ կարեւոր ծրագրերում փաստացի դարձել է կատարող, ոչ թե որոշող։ Այս մոդելը հանգեցրել է պետական ծրագրերի ձախողման։ Օրինակ՝ «Առողջության համապարփակ ապահովագրության» համակարգը, որը պետք է գործեր դեռ 2024 թվականի օգոստոսից, մինչ օրս ընդամենը «խոստում» է մնացել։ Ապահովագրության համակարգը տեսանելի չէ` առնվազն մինչեւ մյուս տարի, քանի որ Էլեկտրոնային դեղատոմսերի իրավակարգավորումները եւս հետաձգվել են մինչեւ 2027 թվական։

«Բոլոր առանցքային որոշումները կայացվում են փոխնախարարի կողմից, առանց մասնագիտական հանրության լայն ներգրավման։ Սա արդեն կառավարման լուրջ ճգնաժամ է», – «Ժողովուրդ» օրաթերթի հետ զրույցում նշեց «Առողջության իրավունք» ՀԿ նախագահ Անուշ Պողոսյանը։

Նկատենք, որ անարդյունավետ կադրային քաղաքականության հետեւանքները առավել ակնհայտ դարձան օրերս՝ բրուցելոզի բռնկման ժամանակ, երբ նախարարության արձագանքն ուշացած էր, իսկ միջոցառումները՝ չհիմնավորված։

Հիվանդությունների վերահսկման եւ կանխարգելման ազգային կենտրոնի նոր տնօրենի՝ Ստեփան Աթոյանի նշանակումը, ըստ տարբեր աղբյուրների, դարձյալ Նանուշյանի կողմից է ուղղորդվել։ Նրա՝ կասկածելի մասնագիտական ունակությունները երեւացին հենց առաջին հանրային խոսքի ժամանակ, երբ հայտարարեց, թե «Նոր ադրենալինն» ու «կորտիզոնը» նույն հորմոնն են: Եվ ահա «Նոր ադրենալինն» ու «կորտիզոնը» նույն հորմոնը համարող հիվանդությունների կանխարգելման եւ վերահսկման ՊՈԱԿ-ի տօրենի ոչ կոմպետենտ լինելու հետեւանքով՝ հանրապետությունում բրուցելոզի բռնկմանը նախարարությունը շատ ուշ արձագանքեց:

Մյուս ուշագրավ փաստն այն է, որ կրճատվել են մարզային էպիդեմիոլոգիական ստորաբաժանումները, ինչի պատճառով մի շարք վարակիչ հիվանդություններ վերահսկելու մեխանիզմներ պարզապես չկան մեր երկրում։

«Երկիրը դեռ չունի հակահամաճարակային գործողությունների ազգային պլան։ Քովիդի համաճարակից անցել է հինգ տարի, նոր միայն աշխատակարգ են ձեւակերպում, Edraft-ում տեղադրել են նախագիծը։ Սա անթույլատրելի ռիսկ է հանրային առողջության համար», – ասաց Պողոսյանը։

Այսպիսով` առողջապահական անվտանգությունը պահվում է «ձգված լարի» վրա, իսկ դրա տակ՝ անձնական որոշումների եւ անհամարժեք կադրերի շղթա է՝ մարդկային ճակատագրեր որոշող»։

Առավել մանրամասն թերթի այսօրվա համարում