Ադրբեջանը թույլ է տվել Ռուսաստանի կողմից հետախուզվող նախկին դատավորին լքել երկիրը

«Խախալևայի գործն Ադրբեջանում ավարտված է։ Ռուսաստանյան կողմի պահանջով նրա արտահանձնումը մերժելու մասին դատարանի որոշման ընդունումից հետո նա լքել է Ադրբեջանը և մեկնել երրորդ երկիր», - ասել է փաստաբանը։ Ըստ Հումբաթովայի, ինքը չգիտի, թե կոնկրետ որ երկիր է մեկնել Խախալևան և որտեղ է նա այժմ գտնվում։

Փաստաբանը հիշեցրել է, որ 2025 թվականի հունվարին Բաքու ժամանելուց հետո նախկին դատավորը ձերբակալվել էր և պահվում էր Քյուրդախանի արվարձանային ավանում գտնվող քննչական մեկուսարանում։ «Ես բողոք եմ ներկայացրել, և վերաքննիչ դատարանը բեկանել է կալանքի մասին դատավճիռը՝ իմ պաշտպանյալին հանձնելով ոստիկանության հսկողությանը», - նշել է Հումբաթովան։ Նա հավելել է, որ դրանից հետո Խախալևան որոշ ժամանակ ապրել է վարձակալած բնակարանում։ Փաստաբանը պարզաբանել է, որ ընթացակարգի համաձայն՝ ոստիկանության հսկողության են հանձնում մինչև արտահանձնման հարցի լուծումը։ Այն բանից հետո, երբ Ադրբեջանի գլխավոր դատախազը որոշում է կայացրել Խախալևային Ռուսաստան արտահանձնելուց հրաժարվելու մասին, նա ինքնաբերաբար ազատ է համարվել։

ԱԴԾ-ի տվյալներով՝ 2021 թվականի դեկտեմբերի 8-ին Խախալևան մեկնել է Երևան և Ռուսաստան չի վերադարձել։ Քննության վարկածով՝ 2016-ից 2019 թվականներին նա աշխատավայրից բացակայել է 127 աշխատանքային օր։ Ընդ որում, նա խաբել է աշխատաժամանակի հաշվառման տեղեկագրերը լրացնող աշխատակիցներին, իսկ ավելի ուշ ինքն է ստորագրել դրանցում։ Ընդհանուր առմամբ, նա անօրինական կերպով ստացել է 1,195 միլիոն ռուբլի աշխատավարձ։

Նրա շուրջ սկանդալը բորբոքվել է 2017 թվականի ամռանը համացանցում նրա դստեր շքեղ հարսանիքի մասին տեղեկատվության տարածումից հետո, որտեղ իբր ելույթ են ունեցել Վերա Բրեժնևան, Իոսիֆ Կոբզոնը, Նիկոլայ Բասկովը և Վալերի Մելաձեն։ Բացի այդ, ԶԼՄ-ներում, որոնք նրան «ոսկե դատավոր» էին անվանել, հրապարակումներ են հայտնվել այն մասին, որ Խախալևայի դիպլոմը կեղծ է։