Դուբայում աղջկան ենթարկել է սեռական շահագործման
Արաբական Միացյալ էմիրություններ Հայաստանից աղջկա տեղափոխելու եւ սեռական շահագործման ենթարկելու մեղադրանքով 12 տարվա ազատազրկման դատապարտված Բավական Խաչատրյանի շահերի պաշտպանը դիմել է Վերաքննիչ դատարան: Մերուժան Մկրտչյանը պահանջում է բեկանել ամբողջությամբ ՀՀ Կոտայքի մարզի ընդհանուր իրավասության դատարանի դատավճիռը կամ գործն ուղարկել ստորադաս դատարան կամ կայացնել նոր դատական ակտ:
Բավական Խաչատրյանին մեղադրանք է առաջադրվել այն բանի համար, որ նա կազմակերպված խմբի կազմում, շահագործման նպատակով, խաբեության միջոցով, Հայաստանում հավաքագրել եւ Արաբական Միացյալ էմիրությունների Դուբայ քաղաք է տեղավտխել Թեհմինե Սերոժի Ալեքսանդրյանին, նրան փոխանցել Նելլի Ներսիսյանին եւ վերջինից ստացել նյութական օգուտ:
Բավական Խաչատրյանը Արաբական Միացյալ էմիրություններում բնակվող Նելլի Ներսիսյանի կողմից՝ մարդկանց շահագործման եւ գույքային օգուտներ ստանալով պոռնկությամբ զբաղվելուն նպաստելու համար ստեղծված եւ ղեկավարված կազմակերպված խմբի կազմում ստանձնելով Հայաստանում կանանց հավաքագրման եւ նրանց ԱՄԷ Դուբայ քաղաք տեղափոխման գործողությունների կատարման դերակատարությունը, նյութական օգուտ ստանալու նպատակով, 2008թ. փետրվարին, Հրազդանում խաբեության միջոցով՝ Դուբայում հագուստի առեւտրով համատեղ զբաղվելու կեղծ առաջարկով, իրականում, սակայն, հանցավոր խմբի անդամների կողմից սեռական շահագործման ենթարկելու նպատակով, հավաքագրել է Թեհմինե Ալեքսանդրյանին: Այնուհետեւ՝ Դուբայ մեկնելու համար մուտքի հրավերի ստացման նպատակով, Թեհմինե Ալեքսանդրյանի անձնագրի պատճենն էլեկտրոնային փոստի միջոցով ուղարկել է Դուբայ՝ Նելլի Ներսիսյանին, ով կազմակերպել է Թեհմինե Ալեքսանդրյանի՝ Դուբայի մուտքի հրավերը եւ այն նույն եղանակով ուղարկել Բավական Խաչատրյանին: Դրանից հետո՝ 2008թ. մարտի 1-ին, Բավական Խաչատրյանը Թեհմինե Ալեքսանդրյանին ճանապարհել է Վրաստանի Հանրապետության Թբիլիսի քաղաք, որտեղից էլ՝ վերջինը Թբիլիսի-Դուբայ չվերթով մեկնել է Դուբայ:
Թեհմինե Ալեքսանդրյանին Դուբայում դիմավորելուց հետո, հանցավոր խմբի ղեկավար Նելլի Ներսիսյանը բանկային փոխանցման եղանակով Բավական Խաչատրյանին է ուղարկել 600 ԱՄՆ դոլար՝ որպես նրա կատարած գործողությունների համար նյութական օգուտ, իսկ հանցավոր խմբի մեկ այլ անդամի՝ ոմն Նառայի միջոցով վերցրել է Թեհմինե Ալեքսանդրյանի անձնագիրը, որից հետո՝ օգտագործելով Թեհմինե Ալեքսանդրյանի մոտ՝ տեղանքին անծանոթ լինելու, անձնագիր չունենալու պայմաններում ազատ տեղաշարժվելու եւ տեղափոխման համար կատարված ճանապարհածախսի գումարները վերադարձնելու հնարավորության բացակայության պատճառով առաջացած վիճակի խոցելիությունը, մինչեւ. 2009թ. մայիսի վերջերը Թեհմինե Ալեքսանդրյանին ենթարկել է սեռական շահագործման՝ ստանալով այդ կերպ նրա վաստակած գումարները:
Նշենք, որ նույն գործով Բավական Խաչարյանի քույրը՝ Հերիքնազ Խաչատրյանը հինգ աղջկա սեռական շահագործման նպատակով Դուբայ ուղարկելու համար 11 տարի 6 ամսվա ազատազրկման է դատապարտվել: