Պեկինում ռեկորդային շոգ է գրանցվել

Հինգշաբթի Պեկինում ջերմաստիճանը 2014 թվականից հետո առաջին անգամ բարձրացել է 40 աստիճանից (Ցելսիուս) եւ գերազանցել է հունիսի ամենաշոգ օրվա ռեկորդը։ Սպասվում է, որ շոգը կպահպանվի մինչեւ հանգստյան օրերը, հայտնում է Reuters-ը:

Հինգշաբթին նաեւ դարձել է Պեկինի ամենաշոգ օրը հունիս ամսին այն ժամանակվանից, ինչ հայտնվել են ժամանակակից օդերեւութաբանական տվյալները: Նախորդ ռեկորդը եղել է 1961 թվականի հունիսի 10-ին, երբ սնդիկի մակարդակը բարձրացել է մինչեւ 40,6°C:

Հինգշաբթի վաղ առավոտյան մոտ 22 միլիոն բնակչություն ունեցող քաղաքում նարնջագույն տագնապ է հայտարարվել, որը երկրորդ ամենաբարձր եղանակային ահազանգն է, որի համաձայն քաղաքի շրջանների մեծ մասում հինգշաբթիից մինչեւ շաբաթ ջերմաստիճանը կարող է բարձրանալ մինչեւ 39 աստիճան Ցելսիուս: