Ուգանդայում պատգամավորները քրեականացրել են նույնասեռականությունը

Ուգանդայի խորհրդարանը օրենք է ընդունել, որը իշխանություններին լայն հնարավորություններ է տալիս նույնասեռականներին հետապնդելու համար, հայտնում է Euronews-ը։

Ըստ նոր նորմատիվ ակտի՝ հանցագործություն է դառնում ոչ միայն նույնասեռական սեքսը, այլ, եթե անձը իրեն որպես ԼԳԲՏ համայնքի անդամ է համարում։

Պատգամավորները օրինագծի տեքստում բազմաթիվ փոփոխություններ են կատարել։ Ըստ AFP-ի՝ դեռ հայտնի չէ, թե ազատազրկման ինչ ժամկետներն են հաստատվել։ Անգլալեզու մի շարք լրատվամիջոցներ պնդում են, որ այսպես կոչված «նույնասեռական գործողությունները՝ ծանրացուցիչ հանգամանքներում» պատժվում են ընդհուպ մինչեւ մահապատիժ։

Օրենքի հեղինակ Ասուման Բասալիրվան ասել է, որ իր նախաձեռնությունը կոչված է «պաշտպանելու ուգանդացիների մշակույթը, իրավական, կրոնական եւ ընտանեկան արժեքները»։

Amnesty International-ը նախագահ Յովերի Մուսեվենիին կոչ է արել մերժել խորհրդարանականների ընդունած օրենքը՝ այն անվանելով «լուրջ հարձակում» ԼԳԲՏ+-ի վրա։