ՀՀԿ–ից դեռ պաշտոնապես չեն մեկնաբանում Արթուր Վանեցյանի մանդատը վայր դնելը եւ խմբակցությունում ստեղծված իրավիճակը
ՀՀԿ–ից եւ «Պատիվ ունեմ» խմբակցությունից արդեն երկրորդ օրն է՝ չեն մեկնաբանում «Պատիվ ունեմ» խմբակցության ղեկավար Արթուր Վանեցյանի մանդատը վայր դնելը, ինչպես նաեւ այն, թե մյուս պատգամավորները պահելո՞ւ են մանդատները, թե՝ ոչ։
Արթուր Վանեցյանը պատգամավորական մանդատից հրաժարվելու հայտարարություն էր տարածել նախօրեին, ընդգծելով, որ «այս խորհրդարանը դադարել է լինել իշխանությունների կործանարար գործունեությունը կասեցնելու եւ երկիրն աղետից դուրս բերելու նպատակին հասնելու արդյունավետ հարթակ»։
Վանեցյանը տեղեկացրել էր, որ «Հայրենիք» կուսակցության խորհուրդը որոշում է կայացրել շարունակել գործունեությունը խորհրդարանից դուրս։
«Կուսակցության որոշմամբ դե յուրե եւ դե ֆակտո դադարում է գոյություն ունենալ ՀՀԿ-ի հետ մեր ձեւավորած «Պատիվ ունեմ» դաշինքը, որի շրջանակներում մեր գործընկերների հետ համեմատաբար կարճ, բայց հագեցած ճանապարհ ենք անցել ու, վստահ եմ, դեռ անցնելու ենք՝ հանուն երկրի փրկության, իսկ ապագայում նաեւ՝ մեր պետականության առողջացման եւ ուժեղացման։
Շնորհակալություն եմ հայտնում «Պատիվ ունեմ» եւ «Հայաստան» խմբակցությունների մեր գործընկերներին ՝ միասին անցած ճանապարհի ու համատեղ աշխատանքի համար։
Ուզում եմ վստահեցնել, որ իմ՝ մանդատը վայր դնելու եւ «Հայրենիք» կուսակցության՝ խորհրդարանից դուրս պայքարը շարունակելու որոշումները բացառապես մեր ընտրությունն են եւ որեւէ կերպ չեն կարող կաշկանդող կամ ուղղորդող գործոն հանդիսանալ «Պատիվ ունեմ» խմբակցության մեր գործընկերների, այդ թվում՝ «Հայրենիք» կուսակցության առաջադրմամբ Ազգային ժողով անցած մեր անկուսակցական ընկերների համար․ այս հարցում յուրաքանչյուրն իր գիտակցված, հիմնավորված ընտրությունը պիտի անի»,– հրաժարականի հայտարարության մեջ ասել էր Արթուր Վանեցյանը։
«Պատիվ ունեմ» խմբակցության կազմում 2021 թվականի արտահերթ խորհրդարանական ընտրություններից հետո ընդգրկվել էր 7 պատգամավոր։ Նրանցից երկուսը՝ Թագուհի Թովմասյանը եւ Իշխան Զաքարյանը, «Հայրենիք» կուսակցության քվոտայով էին մանդատ ստացել։ Իշխան Զաքարյանը, որն ըստ ԱԺ կայքի՝ «Հայրենիք» կուսակցության անդամ է, 2021 թվականի դեկտեմբերին խմբակցությունից դուրս գալու որոշում էր կայացրել, նա հիմա որպես անկախ պատգամավոր է։ Խմբակցության մյուս 4 պատգամավորները ՀՀԿ–ականներ են։ Նրանք են՝ Հայկ Մամիջանյանը, Տարոն Մարգարյանը, Աննա Մկրտչյանը եւ Տիգրան Աբրահամյանը։
«Հայրենիք» կուսակցության քվոտայով մանդատ ստացած մյուս պատգամավորը՝ Թագուհի Թովմասյանը երեկ հայտարարությամբ հանդես եկավ, որից պարզ դարձավ, որ մանդատից հրաժարվելու որոշում դեռ չի կայացրել։
«Մանդատները ողջ ընդդիմադիրներով վայր դնելու, հաջորդաբար որեւէ մեկի կողմից դրանց չվերցնելու նպատակահարմարության հարցը բարձրացրել էի դեռ նախորդ տարի նոյեմբերին եւ տարբեր առիթներով խոսել եմ այն մասին, որ մեր երկիրը ձեւով խորհրդարանական է, իսկ բովանդակությամբ՝ ոչ:
Բայց նույնիսկ այդ պայմաներում, կարծում եմ, բոլորդ եք համոզվել, որ անկուսակցականի կարգավիճակով պատգամավորական իմ մանդատը այս տարիներին ծառայել եւ ծառայում է բացառապես ՀՀ քաղաքացուն եւ նրա իրավունքների պաշտպանությանը:
Այս օրերին Վարդենիսում եմ, հույս ունեմ՝ մաքուր, սառը օդը կօգնի առավել արդյունավետ որոշում կայացնել: Բայց ինչ որոշման էլ հանգեմ, բխելու է ՀՀ քաղաքացու շահերից եւ հաշվետու կլինեմ ձեզ»,– ֆեյսբուքյան իր էջում գրել էր Թագուհի Թովմասյանը։
Արդեն երկու օր է՝ Թագուհի Թովմասյանը մեր զանգերն անպատասխան է թողնում։
Հիշեցնենք, որ «Պատիվ ունեմ» դաշինքի ընտրական ցուցակում հաջորդ թեկնածուն ԱԺ նախկին պատգամավոր Մարտուն Գրիգորյանն է։ Առայժմ հայտնի չէ՝ նա կվերցնի՞ մանդատը, թե՝ ոչ։ Նա եւս չի պատասխանում մեր զանգերին։
Հայտնի չէ նաեւ, թե ով է ղեկավարելու «Պատիվ ունեմ» խմբակցությունը։
Խմբակցության քարտուղար Հայկ Մամիջանյանը, որն այս օրերին ԵԽԽՎ նիստի աշխատանքներին է մասնակցում, NEWS.am-ի հետ զրույցում ասաց, որ վերադառնալուն պես կխոսի Արթուր Վանեցյանի մանդատը վայր դնելու եւ խմբակցությունում ստեղծված իրավիճակի մասին։
Արթուր Վանեցյանի հրաժարականին անդրադարձել էր ՀՀԿ փոխնախագահ Արմեն Աշոտյանը, նշելով, որ հարգանքով է մոտենում Վանեցյանի եւ «Հայրենիք» կուսակցության որոշմանը։
«Մեզ համար նույնպես խորհրդարանական մանդատները երբեք ինքնանպատակ չեն եղել եւ ինքնանպատակ չեն։ Բազմաթիվ առողջ ընդդիմադիր ուժերի հետ մենք կիսում ենք միեւնույն ռազմավարական նպատակները, որոնց հասնելու համար կողմերը, այդ թվում՝ ՀՀԿ-ն, կարող են տարբեր մարտավարական լուծումների գնալ»,– գրել էր ՀՀԿ փոխնախագահը։
Հավելենք, որ մանդատը վայր դրած «Պատիվ ունեմ» խմբակցության ղեկավար Արթուր Վանեցյանի լիազորությունները կդադարեցվեն իր հրաժարականի մասին Ազգային ժողովի նախագահի հայտարարությունից մեկ շաբաթ անց։ Խորհրդարանի պաշտոնական էջում երեկ հրապարակվել է ԱԺ խոսնակի հայտարարությունը Արթուր Վանեցյանի հրաժարականի մասին։
Ջեյմի Վարդին կարող է վերադառնալ հայրենիք
Իսպանիայի Սեուտա քաղաքի մի քանի հազար բնակիչներ դուրս են եկել զանգվածային ցույցի
Հայկ Առաքելյանը նշանակվել է շրջակա միջավայրի նախարարի տեղակալ
Գյումրիում կնշվի Երիտասարդության միջազգային օրը
Կայացավ «Արև Արենա» ամառային ճամբարի փակման արարողությունը
«Մեքքայի համաձայնագիրը» վկայում է Վաշինգտոնի հանդեպ վստահության կորստի մասին. Բաղայի
Վահան Միսակյանը նշանակվել է ՀՀ քաղաքաշինության կոմիտեի նախագահի տեղակալ
«Ուժեղ Հայաստան» խմբակցության անունից պետք է հնչի ներողություն, հակառակ պարագայում դուք կիսում եք պա...
Պատգամավորական էթիկային առնչվող հարցերով ԱԺ ժամանակավոր հանձնաժողով կստեղծվի. նախագիծն ընդունվեց միա...
Ինձ համար Ինֆանտինոյի դարաշրջանն ավարտվել