Սրանք կա՛մ սուտ մատնության համար պետք է դատվեն, կ՛ամ պետական դավաճանության․ Արծվիկ Մինասյան
Ես հիմա պահանջում եմ Ազգային անվտանգության ծառայությունից անմիջապես հարուցել քրեական գործ, այս անձանց հրավիրել հարցաքննության, բացատրություններ վերցնել՝ Yerkir.am-ի հետ հարցազրույցում ասաց ԱԺ «Հայաստան» խմբակցության քարտուղար Արծվիկ Մինասյանը՝ խոսելով ընդդիմության բոյկոտից՝ ԱԺ-ում Արցախի դրոշներ տեղադրելուց և Արցախ մեկնելուց հետո, իշխող թիմի հայհոյախառն ելույթների մասին։
«Սրանք կա՛մ սուտ մատնության համար պետք է դատվեն, կամ պետական դավաճանության առերևույթ հանցակազմի տարրերով պետք է սրանց հանդեպ ներկայացվեն մեղադրանքներ։ Հակառակ դեպքում ԱԱԾ-ի այսպիսի անգործությունը կփաստի, որ սրանք, քաղաքական իշխանության հետ միասին, լծված են Հայաստանը թուրք-ադրբեջանական տանդեմին հանձնելու գործընթացին»,-ասաց Արծվիկ Մինասյանը։
Բոլոր նրանք, նշեց նա, ովքեր վախենում են «Արցախ» բառն օգտագործելուց, Արցախի անունը տալուց, արցախահայության իրավունքները պաշտպանելուց, ինքնորոշման իրավունքը բարձրաձայնելուց և այդ ուղղությամբ հետևողական քայլեր իրականացնելուց, բոլորը, ի վերջո, դատվելու են ՀՀ քրեական օրենսգրքի բոլոր այն հոդվածներով, որոնք պետության և հայրենիքի նկատմամբ հանցագործութուններ են համարվում։
«Մենք վճռական ենք, կանգնած ենք հայոց պետականության ու հայ ժողովրդի կողքին։ Արցախի դրոշը, պետականությունը, որպես հայ ժողովրդի պետականության ու շարունակականության դրսևորում, լինելու է մեր պաշտպանության և մեր գործունեության առանցքում»,-վստահեցրեց Արծվիկ Մինասյանը։
Նա վստահություն հայտնեց, որ ՀՀ քաղաքացիները, ընտրողները, սփյուռքահայ եղբայրներն ու քույրերը լիարժեքորեն կաջակցեն այս գործողություններում։
Ընդդիմադիր պատգամավորները, ԱԺ քառօրյան բոյկոտելով, մեկնել են Արցախ, Սյունիք, Տավուշ ու Գեղարքունիք։ Արծվիկ Մինասյանը տեղեկացրեց, որ իրենք հանդիպելու են մեր հայրենակիցների հետ, բարձրաձայնելու են իրենց տեսակետները, լսելու են նաև նրանց մոտեցումները թե՛ անվտանգային, թե՛ սոցիալ-տնտեսական կյանքին առնչվող հարցերի շուրջ։ Ապա իրականացնելու են դրանցից բխող կոնկլրետ քայլեր ու նախաձեռնություններ։