«Ցորի» գործով տուժող կողմն ահազանգում է՝ դատավոր Արմեն Դանիելյանը նիստեր է հրավիրում առանց տուժող կողմին իրազեկելու
«Ցորի» գործով տուժող կողմն ահազանգում է՝ Վերաքննիչ քրեական դատարանի դատավոր Արմեն Դանիելյանի կողմից խախտվել է տուժող կողմի իրավունքները։
Ինչպես արդեն տեղեկացրել ենք՝ Սյունիքի մարզի ընդհանուր իրավասության դատարանը՝ դատավոր Լուսինե Սեփխանյանի նախագահությամբ, անփոփոխ է թողել քրեական գործով միակ ամբաստանյալի՝ Գևորգ Գևորգյանի, նկատմամբ ընտրված խափանման միջոց կալանավորումը, ինչի դեմ պաշտպանը վերաքննիչ բողոք է ներկայացրել, որն այժմ գտնվում է դատավոր Արմեն Դանիելյանի վարույթում։ Բացի բողոքից՝ պաշտպանը նաև հանցագործության մասին հաղորդում է ներկայացրել դատավորի դեմ՝ պահանջելով քրեական գործ հարուցել իր պաշտպանյալին ակնհայտ ապօրինի կալանավորելու հատկանիշներով։
Մարտի 23-ին Վերաքննիչ դատարանում՝ Արմեն Դանիելյանի նախագահությամբ, պետք է կայանար բողոքի քննությունը, որը սակայն հետաձգվել է՝ պաշտպանության կողմի նախաձեռնությամբ։ Մասնավորապես, պաշտպանը միջնորդել էր հետաձգել դատական նիստը՝ մինչև դատավոր Լուսինե Սեփխանյանի դեմ ներկայացված հանցագործության մասին հաղորդման հիման վրա քրեական գործ հարուցելու կամ մերժելու որոշման մասին տեղեկատվության ստացումը։ Տուժող կողմը, սակայն, մտահոգությունի ունի՝ կապված իրենց իրավունքների խախտման վերաբերյալ, քանի որ դատական նիստը կայացել է՝ առանց տուժող կողմի մասնակցության, քանի որ դատարանը չէր ծանուցել կողմին։ Գործով տուժողների իրավահաջորդների ներկայացուցիչ Լիպարիտ Սիմոնյանը «Փաստինֆո»-ի հետ զրույցում հայտնեց, որ մինչ օրս վերաքննիչ դատարանը տուժողների իրավահաջորդներին և իրեն չի ծանուցել, հիմա մնում է միայն որոշել՝ չծանուցվելու պայմաններում գնալ, թե չգնալ՝ թողնելով Արմեն Դանիելյանը շարունակի տուժողների իրավահաջորդների իրավունքները խախտել: Փաստաբանը հայտնեց, որ մարտի 25-ին բողոքի վերաբերյալ պատասխան է ուղարկել Վերաքննիչ դատարան՝ միևնույն ժամանակ նշելով, որ դատական նիստին ծանուցի իրենց, սակայն ծանուցում դեռևս չեն ստացել։
Հիշեցնենք, որ քրեական գործով Գեւորգ Գեւորգյանին մեղադրանք է առաջադրվել՝ ՀՀ քրեական օրենսգրքի 375-րդ հոդվածի 4-րդ մասով. ըստ նախաքննական մարմնի՝ անձնական շահագրգռվածությունից ելնելով` սեփական կյանքը փրկելու նպատակով, ՊԲ N զորամասի հրետանային դիվիզիոնի պատասխանատու սպա, մայորը դրսևորել է իշխանության անգործություն, որն առաջացրել է ծանր հետևանքներ։
Նախաքննության ընթացքում Գևորգյանը ցուցմունք է տվել՝ հայտնելով, որ երբ իրենց Ֆիզուլիի հատվածում տեղափոխել են նշված տեղամաս, տվել են նշանակետեր, որոնք Դ-20 տիպի հրանոթով խոցում էին, հասկացել է, որ մեր խոցելի հեռավորությունը 4200 մ է, մինչդեռ այդ տիպի հրանոթը խոցում է մոտ 17 կմ, ինչից մայորի մոտ հարց է առաջացել, թե ինչու այդքան հեռահար խոցող զինտեխնիկան տեղադրված է 4 կմ հեռավորության վրա, ինչի վերաբերյալ մտահոգությունը բարձրացրել է նաև հրամանատարության կազմի մոտ։