Եթե էդպես բարձրախոս արգելող տղերք են, թող գնան ադրբեջանցիքին արգելեն բարձրախոսով ահաբեկել մեր ժողովրդին. Մամիջանյան
Կառավարության շենքի դիմաց ՀՀԿ-ական եւ ՀՅԴ-ական երիտասարդների բողոքի ակցիայի մասնակիցներին ոստիկանները խնդրեցին որոշակի հեռավորության վրա ակցիան իրականացնել, նաեւ չօգտագործել բարձրախոս, քանի որ դրանով խանգարում են կառավարության բնականոն գործունեությանը:
«Եթե էդպես բարձրախոս արգելող տղերք են էնտեղ նստած, թող գնան ադրբեջանցիքին արգելեն բարձրախոս օգտագործել: Ես բարձրախոսն օգտագործելու եմ: Եթե ինչ-որ մեկը փորձի ինձ խոչընդոտել՝ խնդրեմ»,-ասաց ԱԺ «Պատիվ ունեմ» խմբակցության պատգամավոր Հայ Մամիջանյանը:
Հավաքվածները սկսեցին վանկարկել՝ «Նիկոլ Դավաճան»:
Հայկ Մամիջանյանը շարունակեց. «Այս ակցիան խաղաղ անհնազանդության ակցիա է, որը ցույց է տալիս էս շենքում նստածներին, որ մեր երկրում ոչ ոք համաձայն չէ եւ պնդում է, որ Արցախը երբեք չի լինելու Ադրբեջանի կազմում: Եթե էս շենքում նստած իբր աշխատողներն էդքան կարողանում են բարձրախոս արգելել, թող գնան ու ադրբեջանցիներին արգելել բարձրախոսով ահաբեկել մեր հայրենակիցներին:
Այս իշխանությունների խոստացած ապագան գրեթե ամենշաբաթյա զոհերով, գերիներով, հողային կորուստներով ապագան է: Մենք այդպիսի ապագա ուզո՞ւմ ենք: Սրանց բերած խաղաղությունը ենթադրում է՝ ինչ ուզեն, ոնց ուզեն մեր երկրի հետ անեն, մենք եկել ենք ձեզ ասենք, որ չի ստացվելու ոչ ձեր մոտ, ոչ թուրքի: Խոսելու, ելույթների ժամանակ վաղուց արդեն մոտեցել է ավարտին, ժամանակն է գործողություններով, մեր կեցվածքով, պահվածքով սրանց ցույց տալ, թե ոնց է պետք Հայաստանը ներկայացնել»:
Նշենք, որ ԱԳ նախարարության դիմաց այսօր բողոքի ակցիա են իրականացրել ՀՅԴ-ական եւ ՀՀԿ-ական ու այլ երիտասարդներ, որոնք երթով շարժվել են դեպի կառավարության շենք: ԱԳՆ-ի, ինչպես նաեւ կառավարության շենքերը հսկում են բազմաթիվ ոստիկաններ, որոնք պատ են կազմել: