Hyundai-ն դադարեցրեց համագործակցությունը «Չելսիի» հետ

Հարավկորեական Hyundai ավտոմեքենաշինական ընկերությունը դադարեցրել է համագործակցությունը Լոնդոնի «Չելսի» ֆուտբոլային ակումբի հետ, որը ռուսաստանցի սեփականատեր Ռոման Աբրամովիչի հետ ենթարկվել է տնտեսական պատժամիջոցների, հաղորդում է Goal.com-ը։

«Hyundai-ն աջակցություն է ցուցաբերում սպորտին, որի մեջ տեսնում է բարության ուժը։ Մենք հպարտ ենք, որ «Չելսիի» հետ համագործակցության շնորհիվ աջակցում ենք ֆուտբոլիստներին եւ երկրպագուներին։

Սակայն այսօրվա հանգամանքներում մենք որոշել ենք, որ անհրաժեշտ է դադարեցնել մեր մարկետինգային եւ կոմունիկացիոն գործունեությունը ակումբի հետ մինչեւ հաջորդ որոշումը»,- նշվում է ընկերության հայտարարությունում։

«Չելսին» Hyundai-ի հետ համագործակցությունից ստանում է տարեկան մոտ 12 միլիոն եվրո։

Մեծ Բրիտանիայի կառավարության պատժամիջոցների հետեւանքով «Չելսին» զրկվել է առեւտրային գործունեությամբ զբաղվելու հնարավորությունից։ Եթե մինչեւ մայիսի 31-ը սեփականատերը չփոխվի, «Չելսին» կզրկվի նաեւ ֆուտբոլային գործունեությամբ զբաղվելու իրավունքից։