«Ընտանիք ենք պահում, ի՞նչ է լինելու մեզ հետ». «Իմ քայլի» ավագանու անդամներն առաջարկում են 2 մարզադպրոց լուծարել
Երեւանի Կենտրոնի մանկապատանեկան համալիր մարզադպրոցը լուծարելու վերաբերյալ նախագիծն ընդգրկված է Երեւանի ավագանու փետրվարի 8-ի նիստում։
Նախագծի հեղինակները «Իմ քայլը» խմբակցության ավագանու անդամներն են։ Նրանք հիմնավորում են, թե այդ մարզադպրոցը չունի իր սեփական մարզադահլիճը, աշակերտներն իրենց մարզումներն անցկացնում են տարբեր հանրակրթական դպրոցների մարզադահլիճներում՝ բախվելով բազմաթիվ խնդիրների։
Այս մարզադպրոցի երեխաները պարապում են գեղարվեստական մարմնամարզություն, բասկետբոլ, վոլեյբոլ, թաեքվոնդո և այլ մարզաձեւեր:
Մարզադպրոցի լուծարումը, ըստ նախագծի հիմնավորման, ենթադրում է նոր՝ «Երեւան քաղաքի Կենտրոն վարչական շրջանի համալիր մարզադպրոց» համայնքային ոչ առեւտրային կազմակերպության ստեղծումը՝ ք. Երեւան, Այասի փողոցի թիվ 12 հասցեում գտնվող մարզադահլիճի բազայի հիման վրա:
«Լուծարվող կազմակերպության գործող բոլոր մարզական խմբերը կտեղափոխվեն նոր ստեղծվող կազմակերպության ներքո, որոնք կգործեն սեփական տարածքում՝ նշված մարզադպրոցում»,- ասվում է նախագծի մեջ։
Մարզադպրոցի աշխատակիցները, սակայն, դեմ են ավագանու այս նախաձեռնությանը։ Մանկապատանեկան համալիր մարզադպրոցի տնօրեն Բելլա Ղազարյանը NEWS.am-ի հետ զրույցում ներկայացրեց անձնակազմի դժգոհությունը։
«Մեր մարզադպրոցը 34 աշխատող ունի, որից 21-ը մարզիչներ են, իսկ մարզադպրոց հաճախում է 250 երեխա։ Մենք Երեւանի ամենալավ դպրոցների դահլիճներում ենք մեր սաներին պարապում, դրանք բարեկարգ դահլիճներ են։ Մենք 30 տարուց ավելի ստաժ ունեցող մասնագետներ ունենք։ Վերջերս Նատալյա Ռոտենբերգի անվան գավաթի խաղարկություն կայացավ, մեր մարզադպրոցի երեխաները մրցանակային տեղեր գրավեցին։ Առհասարակ, մարզական նվաճումների առումով մեր մարզադպրոցի պատմությունը շատ լավն է, մեր սաներն ընդգրկվում են ազգային հավաքականների թիմերում։ Իսկ իրենք որոշել են լուծարել այդ մարզադպրոցը»,- ասաց տնօրեն Բելլա Ղազարյանը։
Փետրվարի 8-ի ավագանու նիստում ընդգրկված է նաեւ «Երեւանի Կենտրոնի աթլետիկայի մանկապատանեկան մարզադպրոց» համայնքային ոչ առեւտրային կազմակերպության լուծարման հարցը։ Ի դեպ, այս երկու նախագծերը ավագանու նիստում ներառված են եղել դեռ 2021 թվականի նոյեմբերի 30-ի նիստում, սակայն, հեղինակների կողմից հանվել էին օրակարգից։
Այն ժամանակ ըստ Բելլա Ղազարյանի՝ ծնողներն իրենց դժգոհություններն էին հայտնել մարզադպրոցի հնարավոր լուծարման վերաբերյալ, իսկ իրենք էլ գնացել էին թաղապետարան, որտեղ վստահեցրել էին, թե մարզչական կազմը պահպանվելու է։
«Մեզ ասացին՝ չէ, էդպիսի բան չկա, մարզչական կազմը պահում ենք, բայց դե նախագծում գրված է, որ լուծարվում ենք։ Հիմա էլ զանգում եմ «Իմ քայլը» խմբակցություն, զանգերին չեն պատասխանում։ Մեր ամբողջ կոլեկտիվը պահանջում է, որ նախագծի հեղինակները գան մեզ հետ հանդիպեն, բացատրեն, թե էս ինչ նախագիծ է։ Բոլորն էլ աշխատող են, ամեն մեկը մի ընտանիք է պահում, ի՞նչ է լինելու մեզ հետ, չպարզաբանված հարցեր կան, պիտի պարզաբանեն չէ՞»,- նշեց Մանկապատանեկան համալիր մարզադպրոցի տնօրենը։
Նրա խոսքով, Այասի փողոցի թիվ 12 հասցեում գտնվող մարզադահլիճը անմխիթար վիճակում է։
«Դուք որ մտնեք էդ շենքը՝ կփախնեք։ Մարզումներ անելու պայմաններ չկան, հատակը կոտրված է, առաստաղից կաթում է, ջեռուցում չկա, շենքն անմխիթար վիճակում է։ Տրավմաների բուն է էդ դահլիճը, մարզումների համար ոչ բարենպաստ պայմաններ են։ Մենք մեր սաներին կկորցնենք, ծնողն առաջինը նայում է պայմաններին, ո՞ր մի ծնողն իր երեխային կբերի անմխիթար շենքում մարզումների։ Մենք ասում ենք՝ վերանորոգեք, մարզադահլիճը պատրաստ լինի, նոր մեր մարզական խմբերը տեղափոխեք էդտեղ։ Եթե մենք կանք, ինչի՞ են նոր կազմակերպություն ստեղծում։ Չէ որ ոչ մի ավել բան չի լինելու, նույն ուսումնամարզական գործընթացն է իրականացվելու։ Եթե մարզադպրոցը լուծարվի, բոլոր աշխատողներին էլ աշխատանքից կազատեն»,- հավելեց մարզադպրոցի տնօրենը։