Խաչատուր Սուքիասյանի իշխանությունը Նիկոլ Փաշինյանի իշխանությունում մեծանում է․ Ագնեսա Խամոյանը՝ Վահագն Խաչատրյանին նախագահի թեկնածու առաջադրելու մասին
Լրացավ մեկ շաբաթը, ինչ ՀՀ 4-րդ նախագահ Արմեն Սարգսյանը հրաժարական է ներկայացրել և մինչեւ նոր նախագահի ընտրություն, պարտականությունները ժամանակավորապես կկատարի ՀՀ ԱԺ նախագահ Ալեն Սիմոնյանը։ Նախագահի ընտրության և թեկնածուների մասին մամուլում այս օրերին բուռն քննարկում է ընթանում։ Օրեր առաջ տեղեկատվություն էր պտտվում, որ ՔՊ-ի՝ ՀՀ նախագահի թեկնածուի ընտրությունը կանգ է առել ԲՏԱ նախարար Վահագն Խաչատրյանի վրա։
ArmDaily.am-ը ՀՀ ԱԺ «Հայաստան» խմբակցությունից հետաքրքրվեց, թե արդյոք քվեարկելու են Խաչատրյանի օգտին կամ իրենք առաջադրելու են թեկնածու, թե ոչ։
«Թեկնածուի մասով այս պահին քննարկումները դեռևս շարունակվում են, իսկ Նիկոլ Փաշինյանի առաջ քաշած թեկնածուի մասով, անկեղծ ասած, մեծ է գայթակղությունը no comment ասելու։ Կլիներ Վահագն Խաչատրյանը, կլիներ Արայիկ Հարությունյանը, թե իրենց թիմից որևէ մեկը՝ ակնհայտ է, որ վերջինս կատարելու է Նիկոլ Փաշինյանի հրահանգները, և առանց թաքցնելու անգամ, Նիկոլ Փաշինյանը իր վերջին ֆեյսբուքյան հարցազրույցի ժամանակ հայտարարեց, որ լինելու է մարդ, ով կատարելու է իր հրահանգները և ինքը թիմին ներդաշնակեցում է ապահովելու»,-ArmDaily.am-ի հետ զրույցում ասաց պատգամավոր Ագնեսա Խամոյանը։
Խամոյանն ուշադրություն հրավիրեց այն բանի վրա, որ ոչ մի խոսք չի եղել պետության և պետության շահի մասին։
«Բացառապես ներթիմային շահերով է առաջնորդվում և ռեպլիկի կարգով կարող ենք արձանագրել, որ Խաչատուր Սուքիասյանի իշխանությունը Նիկոլ Փաշինյանի իշխանությունում՝ մեծանում է։ Մենք, իհարկե, չենք կարող կողմ քվեարկել»,-նշեց Խամոյանը։
Հարցին, թե Փաշինյանն անընդհատ տալիս է նախկինների անունն ու ամեն ինչում մեղադրում նրանց, արդյոք Վահագն Խաչատրյանը նախկին չէ, քանի որ գիտենք, որ վերջինս դեռ հանդիսանում է ՀԱԿ-ի անդամ, պատասխանեց․ «Վահագն Խաչատրյանը այնքան նախկին է կամ նախկինի նախկին, որ Նիկոլ Փաշինյանի երիտասարդ թիմակիցները կենսագրականը ընթերցելով են միայն իմացել կամ նոր իմանում, որ նախկին քաղաքապետ է եղել, Նիկոլ Փաշինյանի թիմի համար բացահայտում եղավ, որ ընդդիմությանը, ժողովրդական խոսքով ասած, «գցելով է» դարձել քաղաքապետ։ Վահագն Խաչատրյանի մասին լավ ձևակերպում է տվել իր քաղաքական հայր, առաջին նախագահ Լևոն Տեր-Պետրոսյանը, իր և մյուսների՝ Ջհանգիրյանի, Վլադիմիր Կարապետյանի փախուստը իր թիմից դեպի Նիկոլ Փաշինյանի թիմ, իհարկե իշխանություն ունեցած Նիկոլ Փաշինյանի թիմ, ընդամենը մեկ բառով է ձևակերպել՝ առնետավազք և սրանով ամեն ինչ ասված է»,-եզրափակեց Խամոյանը։