Նիկոլ Փաշինյանի բուն նպատակը ոչ թե Թուրքիայի գրկում հայտնվելն է, այլ դրանից հետո Հայաստանից, Հարավային Կովկասից ռուսական զորքերի դուրսբերումը. Նահապետյան
Նիկոլ Փաշինյանն իր լրագրողական, իսկ հետո քաղաքական գործունեության ընթացքում անթաքույց ցույց է տվել, որ Արցախը Հայաստանի համար գլխացավանք է։ Այդ գլխացավանքից ամբողջովին ազատվելու և Թուրքիայի գիրկը նետվելու ժամանակն է եկել։ «Փաստինֆո»-ի հետ զրույցի ժամանակ ասաց ռազմական փորձագետ Հայկ Նահապետյանը։
Ըստ նրա՝ Նիկոլ Փաշինյանի բուն նպատակը ոչ թե Թուրքիայի գրկում հայտնվելն է, այլ դրանից հետո հիմնավորել, որ ՀՀ-ում ռուսական զինուժի անհրաժեշտությունն այլևս չկա՝ ի դեմս 102-րդ ռազմաբազայի Գյումրու և Երևանի հենակետերի։
«Այսինքն՝ բուն նպատակը Հայաստանից, Հարավային Կովկասից ռուսական զորքերի դուրսբերումն է, իսկ դա ԱՄՆ-ի և ՆԱՏՕ-ի անդամ երկրների մարտավարական խնդիրն է»,-նշեց փորձագետը։
Հայկ Նահապետյանը կարծում է, որ Նիկոլ Փաշինյանի քայլերն ուղղված են Արցախի հետ կապերը կտրելուն, և իր քայլերն արդարացնելու համար հրապարակավ քայլեր է անում, որ ձեռնոց նետի Ադրբեջանի իշխանություններին։
«Ադրբեջանը խիստ և կոշտ կերպով միջազգային տարբեր ատյաններում հայտարարում է, թե Հայաստանը խախտում է պայմանավորվածությունները։ Երբ Հայաստանից պատգամավորներ կամ պատասխանատու անձինք են գնում Արցախ, դրա մասին Ադրբեջանի հատուկ ծառայություններն իմանում են և Ադրբեջանի նախագահը հայտարարություն է անում անմիջապես։ Ցանկացած հարց կարող են լուծել առանց այդ պատգամավորների, նախարարների Արցախ հայտնվելու։ Ուստի, եթե Նիկոլ Փաշինյանը ցանկանում է գործ անել, ապա դա պետք է անաղմուկ անի, առանց հրապարակային ցցուն կեցվածքի, օրնիբուն աշխատի, որ մեր հայրենակիցները մնան Արցախում»,-նշեց Հայկ Նահապետյանը։
Վերջինս նշում է, որ եթե հայերն Արցախից դուրս գան, ինքնաբերաբար այդ տարածքն ամբողջովին կանցնի Ադրբեջանին։ Փորձագետը հարց է բարձրացնում, թե հիմա որքանով են Հայաստանի օրվա իշխանությունները նպաստում, որ Արցախում կասեցվի արտագաղթը և դրան ի հակառակ լինի նաև ներգաղթ։ Մինչդեռ հատկապես ԱԺ ընդդիմադիր պատգամավորների խոսքերով բազմաթիվ խնդիրներ կան, այդ թվում հոսանքի, էլեկտրակայանների, ջրամատակարարման հետ կապված խնդիրներ, և դրանք փորձագետի խոսով մարդկանց ստիպելու են վաղ թե ուշ չկարողանալ ընտանիքի համար նվազագույն պայմաններն ապահովել ու Արցախից դուրս գալ։
«Այսինքն` դա այն է, ինչ ձեռք է տալիս Ադրբեջանի իշխանություններին։ Հայաստանի իշխանությունների քայլերը նույնականանում է Ադրբեջանի իշխանությունների քայլերի հետ։ Արցախյան հիմնախնդրի լուծումը Ադրբեջանը և Նիկոլ Փաշինյանի վարչախումբն այդպես են տեսնում, որ հայերը դուրս գան այնտեղից։ Ինչո՞ւ է ՌԴ-ի կողմից հարյուրավոր տոննաներով շինանյութ տարվում Արցախ, ինչո՞ւ են սարքավորումներ, մարդկանց կենսաապահովման համար անհրաժեշտ այլ սարքավորումներ տարվում, որովհետև ՌԴ-ն պատկերացնում է, որ եթե այդ տարածքում հայ չապրի, ապա խաղաղապահների այդտեղ մնալն իմաստազրկվում է, դրա համար ՀՀ իշխանությունների գործառույթն իր վրա է վերցրել»,-ասաց Հայկ Նահապետյանը։
Անդրադառնալով դիտարկմանը, որ ՀՀ վարչապետ Նիկոլ Փաշինյանը մամուլի ասուլիսի ժամանակ չպատասխանեց հարցին, թե պատերազմից հետո բանակում ինչ վերազինումներ են իրականացվել, Հայկ Նահապետյանը նկատեց՝ ընդդիմադիր գործիչ Նիկոլ Փաշինյանն ուղղակի քաղաքական պայքար է մղում վարչապետ Նիկոլ Փաշինյանի հետ։ Ընդ որում` փորձագետի խոսքով վարչապետ Նիկոլ Փաշինյանը ճիշտ է արել, որ չի պատասխանել հարցին, քանի որ ՀՀ զինված ուժերի, մասնավորապես բանակի կողմից զենք-զինամթերքի գնումները փակ տեղեկատվություն է, և իր մեջ գաղտնիության գործոն կա։
«Նա ճիշտ է անում, որ այդ մասին չի բարձրաձայնում, բայց նա մոռանում է, երբ ճղճղան ձայնով, փրփուրը բերանին վճարովի ընդդիմադիրի գործունեություն էր իրականացնում, նա բանակի վերաբերյալ ասում էր բաներ, որն իր մեջ գաղտնիության տարրեր էր պարունակում և դրա մասին չպետք է բարձրաձայներ»,-ասաց Հայկ Նահապետյանը։