Փաշինյանը ցանկանում է պաշտոնանկ անել Հայկ Մարությանին․ «Հայկական Ժամանակը» հեռացման ստարտը տվեց
Ըստ ամենայնի Երևանի քաղաքապետ Հայկ Մարությանի պաշտոնավարման օրերը հաշված են։ Քիչ առաջ Նիկոլ Փաշինյանի ընտանեկան կայքում հրապարակվեծ մի հոդված, որում Հայկ Մարությանին մեղադրում են նախկինների և հատկապես երկրորդ նախագահ Ռոբերտ Քոչարյանի հետ կապ ունենալու մեջ։ Հոդվածում մասնավորապես ասվում է․«Հայտնի է, որ Երևանի քաղաքապետ Հայկ Մարությանը, իր պաշտոնավարման մեկնարկից սկսած, բազմաթիվ անգամներ ցանկություն է ունեցել հրաժարական տալ, բայց վարչապետ Նիկոլ Փաշինյանի հորդորով ամեն անգամ հետ է կանգնել այդ մտքից:
Սակայն տարօրինակ կերպով ամեն ինչ փոխվեց, երբ նա պատերազմի օրերին հայտնի գեներալ Արթուր Ալեքսանյանի (Ամարասի Արթուր) հետ, որի հետ նա ունի քավոր-սանիկական հարաբերություններ, մեկնեց Արցախ:
Ըստ շրջանառվող տեղեկությունների՝ պատերազմի ավարտից հետո նա դիմում է ներկայացրել «Քաղաքացիական պայմանագիր» կուսակցությունից հեռանալու մասին և խզել հարաբերություններն իշխող ուժի անդամների հետ:
Այժմ շրջանառվող տեղեկությունների համաձայն՝ Մարությանը իր քավորի՝ Ամարասի Արթուրի միջոցով նաև սերտ հարաբերություններ է հաստատել մեկ այլ գեներալի՝ ԱԺ «Հայաստան» խմբակցության ղեկավար Սեյրան Օհանյանի հետ, որը նույնպես Ամարասի Արթուրի սանիկն ու մտերիմ ընկերն է:
Տեղեկություններ են շրջանառվում նաև այն մասին, որ պատերազմի ավարտից հետո Հայկ Մարությանը Սեյրան Օհանյանի միջնորդությամբ հանդիպել է Ռոբերտ Քոչարյանի հետ: Հատկանշական է, որ նրա հետ հանդիպումից հետո Մարությանի նկատմամբ շատ լոյալ դիրք են գրավել նաև Ռոբերտ Քոչարյանի ենթակայության տակ գտնվող լրատվամիջոցները, որոնք նախկինում «օր ու արև չէին տալիս» Մարությանին, և նա ամենաշատ քննադատության արժանացող պաշտոնյաներից էր իշխող քաղաքական թիմում»,-ասվում է հոդվածում:
Փաշինյանի ընտանեկան կայքում այս հոդվածի հրապարակումը նշանակում է, որ իշխանական ընտանիքը որոշել է ազատվել նրանից և սա գործընթացի սկզբի ազդարարում կարելի է համարել։