Պետությունը վաճառել է թամանյանական շենքն ու մի կողմ քաշվել
«Հրապարակ»-ը գրում է. «Մարգարյան ծննդատան շենքի հարեւանությամբ՝ Արամի 54 հասցեում, սեւ տուֆից մի շինություն կա, որն օրեցօր կորցնում է գեղեցկությունը եւ փլատակի վերածվում: Շքեղ պատշգամբի տակ կանգնելը վտանգավոր է դարձել: Այնքան խարխուլ է, որ երկար նայելիս թվում է՝ հիմա գլխիդ կփլվի:
Նախկինում՝ դեռ կոմունիստներից առաջ, 1860 թվականին, շենքը երկհարկանի է եղել: Այստեղ ռուսական կայսերական բանկ է եղել, որը հեղափոխությունից հետո դարձել է Հայաստանի առաջին հանրապետության պետական բանկ, 1930-ականների սկզբին ճարտարապետ Նիկողայոս Բունիաթյանն ավելացրել է երրորդ հարկը, լայնացրել տարածքը՝ հավատարիմ մնալով շենքի հին տեսքին: 1919 թվականից բանկի փոխարեն Արամի 54-ում հիվանդանոց էր գործում, քաղաքային երկրորդ կլինիկան, որն այսօր էլ կա եւ կոչվում է «Թիվ 2 բուժմիավորում» ՓԲԸ, որը նախկինում պատկանում էր պատգամավոր Սեյրան Սարոյանին:
Գլխավոր մուտքը, որի վրա հիմա էլ մոր եւ մանկան քանդակ կա, Մաշտոցի պուրակին է նայում: Այն փակ է: Պատին փակցված է խորհրդային տարիներից մնացած ցուցանակ՝ «Պահպանվում է պետության կողմից»: Բայց եթե այս տեմպերով «պահպանվի», շենքը շուտով ուղղակի կվերանա Երեւանի քարտեզից: Քաղաքապետարանում, որը պետք է գոնե տեղյակ լինի մայրաքաղաքի պատմական շենքերի ճակատագրից, Արամի 54-ի մասին տեղեկություն չունեն, թե ով է սեփականատերը, եւ ինչ է լինելու հետո:
Լրատվության վարչությունից մեզ ասացին, որ Երեւանի պետական բանկի շենքը ներառված է պատմության եւ մշակույթի անշարժ հուշարձանների պետական ցանկում, հետեւապես պետք է դիմել կրթության եւ մյուս բաների նախարարություն, քանի որ նախարարությունն է զբաղվում հին շենքերի պահպանությամբ: Նախարարության խոսնակը գրավոր հարցում պահանջեց, «քանի որ հարցը հրատապ չէ եւ կարող է սպասել»:
ՀՀ կառավարության որոշմամբ, Արամի 54 հասցեում գտնվող շինությունները սեփականության իրավունքով պատկանում են «Թիվ 2 բուժմիավորում» ՓԲԸ-ին: Իսկ շենքի սեփականատերն առողջապահության նախկին նախարար Հարություն Քուշկյանն է: Մի երկու տարի առաջ, պատասխանելով լրագրողների հարցերին, նա ասել էր, որ մտադիր է պահպանել շենքի հին տեսքը, սակայն այս պահին այդ շենքի հետ կապված որեւէ ծրագիր չունի:
Մենք հետաքրքրվեցինք պարոն Քուշկյանի մամուլի քարտուղարից, թե արդյոք արդեն որոշե՞լ են շենքի ճակատագիրը, շենքի հետ կապված՝ ունե՞ն ինչ-որ ծրագրեր: «Շենքի հետ կապված ոչինչ չի փոխվել»,- եղավ պատասխանը:
Իհարկե, սա սեփականատիրոջ գործն է, եւ նա մեղավոր չէ, որ պետությունը, վաճառելով նրան մշակութային հուշարձանը, որեւէ պարտականություն չի նշել պայմանագրում: Փաստորեն, մեզ մնում է ապավինել սեփականատիրոջ բարոյականությանն ու սպասել, որ նա կպահպանի պատմական հուշարձանը, ու շենքը երբեւէ կծառայի նաեւ երեւանցիներին»: