Արագ քայլերով դեպի Երևան. Մհեր Արմենիան ոտքով Շուռնուխից հասել է Ջերմուկ
«Ազգի ձայն» կուսակցության առաջնորդ, երգիչ Մհեր Արմենիան շարունակում է համազգային շարժումը։ Քայլերթով Սյունիքի մարզի Շուռնուխ գյուղից ոտքով, երբեմն մեքենայով հասել է Վայոց Ձորի մարզ՝ Ջերմուկ քաղաք ու լուսանկար հրապարակել։
Մհեր Մեսրոպյանը գիշերել է Վայոց Ձորի Սարավան գյուղում, ապա քայլերթը շարունակել։ Մհեր Արմենիայի հետ քայլում է նաև կուսկացության անդամներից Ռոման Նազարյանը, իսկ նրանց մեքենայով ուղեկցում է գաղափարակիցներից մեկը։
Կուսակցության անդամները անցել են մոտ 128 կմ ճանապարհ՝ չորս օրում։
«Ազգի ձայն»-ը հայտարարել է համազգային շարժման մասին, որ Շուռնուխից ոտքով գալու են Երևան։ Երգիչը Շուռնուխից Որոտան տանող ճանապարհն անցել է մեքենայով՝ ռուս խաղաղապահների ուղեկցությամբ։ Նա հավաստիացրել է, որ դրանից հետո քայլել են ոտքով։
Ըստ Մհեր Արմենիայի, ճանապարհին հանդիպել են քաղաքացիներին, որոնք դժգոհ են կառավարության գործունեությունից, նաև դեմ են, որ նոյեմբերի 9-ին Նիկոլ Փաշինյանը ստորագրի նոր փաստաթուղթ։ Բնակիչները, ըստ Մհեր Մեսրոպյանի, ողջունում են նոր շարժումը։
«Ազգի ձայն»-ը նոյեմբերի 7-ին նախատեսում է լինել Հանրապետության հրապարակում, թույլ չեն տալու նոր փաստաթղթի ստորագրություն, կոմունիկացիաների ապաշրջափակում։
«Առաջինը իրենք պետք է վերադարձնեն գերիներին։ Ինչպե՞ս կարելի է քննարկել նոր փաստաթուղթ, երբ դատում են մեր գերիներին»,-ուղիղ եթերում ասել է երգիչը։