«Հայաստան» խմբակցության պատգամավորները մարզեր են այցելել սեփական միջոցներով, հավելավճարների համար դիմել են ՍԴ
ՀՀ Ազգային ժողովը 2021թ․ հուլիսի 15-ի փոփոխությամբ ԱԺ պատգամավորական գործունեության հետ կապված ծախսերը բարձրացրեց՝ 5 հազար ՀՀ դրամը դարձնելով 250 հազար դրամ։
Yerevan.Today լրատվական-վերլուծական կայքը հարցմամբ դիմել էր ԱԺ «Հայաստան» խմբակցության ղեկավար Սեյրան Օհանյանին՝ պարզելու՝ «Հայաստան» խմբակցությունը, կապված պատգամավորական գործունեության հետ, ո՞ր մարզերն է այցելել 2021 թվականի սեպտեմբեր ամսին և հատկացված 250 հազար դրամից որքա՞ն գումար է ծախսվել։
Հարցման պատասխանը հրապարակում ենք ստորև․
«Հայտնում ենք, որ «Հայաստան» խմբակցության անդամները 2021թ. օգոստոս-սեպտեմբեր ամիսներին այցելել են ՀՀ բոլոր մարզեր և Երևանի վարչական շրջաններ, կազմակերպվել են հանդիպումներ տարբեր համայնքներում, հարյուրավոր ՀՀ քաղաքացիների հետ (այցերը շարունակվում են), ծանոթացել նրանց խնդիրներին և առաջարկներին, ինչով պայմանավորված ընթանում են օրենսդրական նախաձեռնությունների ստեղծման և պատգամավորական գործունեության աշխատանքների կազմակերպման այլ լայնածավալ աշխատանքներ: Նշված այցերը կատարվել են խմբակցության պատգամավորների միջոցներով: Այցերին չեն մասնակցել մինչ օրս ապօրինաբար, Սահմանադրության պահանջների խախտմամբ՝ կալանավորված պատգամավորները:
Ինչ վերաբերում է պատգամավորական գործունեության համար նախատեսված 250 հազար ՀՀ դրամին, ապա հարկ ենք համարում նշել, որ սեպտեմբեր ամսվա համար «Հայաստան» խմբակցության յուրաքանչյուր պատգամավորի աշխատավարձային հաշվին փոխանցվել է 170 հազար ՀՀ դրամ:
Հարկ ենք համարում նշել նաև, որ ինչպես հայտարարավել էր, «Հայաստան» խմբակցությունը պատգամավորական գործունեության հետ կապված ծախսերի ավելացման վերաբերյալ ընդունված օրենքը, ինչպես նաև պատգամավորներին և քաղաքական այլ պաշտոնյաններին պարգևատրելու հարցը վիճարկում է Սահմանադրական դատարանում (05.10.2021թ. դիմումը մուտքագրվել է ՍԴ)»: