Գաղտնիքս առեւտրային թող մնա
Անկախության 30-ամյակի տոնը` «Դոմինո փրոդաքշն» ընկերության կազմակերպմամբ, ոմանց մեծ բավականություն պատճառեց, մյուսները սրբապղծություն համարեցին, ոմանց հիշողության մեջ այն մնաց Աննա Հակոբյանի արցունքներով, բայց այդպես էլ չիմացանք, ի վերջո, թե ինչքան փող է ծախսվել, եւ ովքեր են այդ ահռելի գումարը տրամադրել: Հայտարարեցին, որ գումարի չափն ու աղբյուրները «առեւտրային գաղտնիք» են` հրապարակման ոչ ենթակա, գրում է hraparak.am-ը։
Սակայն, ըստ «օդում կախված լուրերի», գումարի չափը 2 միլիոն դոլարից ավելի է։ «Դոմինո փրոդաքշնը»՝ որպես իշխանության ֆավորիտ կազմակերպություն, իշխանական քարոզչությունն է անում, պետական պատվերներ է ստանում` մեկ անձից գնումների սկզբունքով, առանց մրցույթի: Իսկ 2019 թվականի օգոստոսին էլ ԲՏԱ նախարարությունը շուրջ 1 մլն 200 հազար դրամի գովազդային ծառայություն է գնել «Դոմինո փրոդաքշն» ՍՊԸ-ից:
Սակայն նման միջոցառումներից գլուխ հանողները տարակուսում են, թե ինչի վրա կարող էր ծախսվել 2 միլիոն ամերիկյան դոլարը։ Կոպիտ հաշվարկներով` առավելագույնը 600 հազար դոլար կարող էր ծախսվել՝ դրոնների, համերգային մասի եւ «գունագեղ» էֆեկտների վրա։ Գուցե դրա համա՞ր է առեւտրային գաղտնիք մնում։
Ընկերության տնօրեն Աշոտ Առաքելյանը միջոցառման ավարտից 15 օր անց էլ շարունակում է պահպանել «կոմերցիոն գաղտնիքը»` չի ասում, թե ինչքան գումար է հատկացվել իրեն։ Չի մեկնաբանում նաեւ մեր փոխանցածը, թե, ըստ տարբեր հաշվարկների, միջոցառման ծախսերը բավականին ուռճացված են։
Իսկ հարցին` հնարավո՞ր է, որ բարերարների թվում եղել են Խաչատուր Սուքիասյանը եւ Սամվել Ալեքսանյանը, ասաց. «Ոչ», եւ ավելացրեց, թե հովանավորները երեւացել են էկրաններին։
Տեղեկացրել էինք, որ Աշոտ Առաքելյանին եւ լիբանանահայ Սեւակ Սերոբյանին, որը խիստ ազդեցիկ մասոնական կապեր ու կոնտակտներ ունի, պատկանում է «Բյուրո» սրճարանը։ Աշոտ Առաքելյանն այս հարցին ի պատասխան ասաց․ «Ինձ հետ կապված չէ Սեւակ Սերոբյանը»։ Վերջինս, հիշեցնենք, «Դոմինո փրոդաքշն»-ի փայատերն է եղել, իսկ հիմա, ըստ նրանց երրորդ եւ նախկին գործընկեր Արամ Հարությունյանի, շարունակում է մնալ որպես silent partner։
Աշոտ Առաքելյանն ասում է․ «Էդ որտեղի՞ց եք ճշտում՝ silent է՞, թե՞ silent չէ։ Էդ ո՞վ է ասում։ Եթե Արամ Հարությունյանից եք քաղում Ձեր ինֆորմացիաները` ստել է»։ Ստել է, որ բաժնետերերի փոփոխությո՞ւն է եղել։ «Ոչ, բաժնետերերի փոփոխություն եղել է, բաժնետերերի 100 տոկոսի սեփականատերը ես եմ»,- ասաց նա՝ նշելով, որ ընկերության սնանկացում երբեւէ չի եղել։ Նաեւ վստահեցրեց, թե ընկերության անվանափոխություն էլ չի եղել։ Մինչդեռ համացանցում զետեղված արխիվային նյութերից տեղեկացանք, որ նախկինում այս ընկերությունը կոչվել է ոչ թե «Դոմինո փրոդաքշն», այլ «Դոմինո վիդեո փրոդաքշն», իսկ 2013-ին ՏՄՊՊՀ նիստում «Դոմինո վիդեո փրոդաքշնը» տուգանվել էր կեղծ տեղեկություններ հրապարակելու եւ անբարեխիղճ մրցակցության համար։ Ի դեպ, այս ընկերության հետ կապված հանրային ռեզոնանսի արդյունքում մի հետաքրքիր լուր էլ շրջանառվեց, թե Աշոտ Առաքելյանը «Կյանքի խոսք» կազմակերպության անդամ է, ինչին նա արձագանքեց․ «Առաջին անգամ եմ նման արտահայտություն լսում»։