Ռոնալդինյո. Մեսին պետք է մնա «Բարսելոնայում»

«Բարսելոնայի» ու Բրազիլիայի հավաքականի լեգենդար ֆուտբոլիստ Ռոնալդինյոն հույս է հայտնել, որ արգենտինացի հարձակվող Լիոնել Մեսին չի հեռանա կատալոնական ակումբից:

«Հուսով եմ՝ «Բարսելոնան» կլուծի այդ հարցը: Մեսին պետք է մնա: Նա ակումբի պատմությունն է»,- բրազիլացու խոսքը մեջբերում է Tuttomercatoweb-ը:

Հիշեցնենք, որ Ռոնալդինյոն ու Մեսին միասին «Բարսելոնայում» խաղացել են 2004-2008-ը:

Սպասվում է, որ Մեսին առաջիկայում նոր պայմանագիր կկնքի կատալոնական ակումբի հետ: Հուլիսի 1-ից «Բարսելոնայի» ավագը ստացել է ազատ գործակալի կարգավիճակ: Նախորդ ամռանը 34-ամյա հարձակվողը ցանկանում էր հեռանալ «Բարսելոնայից», սակայն ակումբը բաց չթողեց նրան:

Ավարտված մրցաշրջանում արգենտինացին «Բարսելոնայի» կազմում բոլոր մրցաշարերում անցկացրել է 47 հանդիպում, դարձել 38 գոլի ու 14 գոլային փոխանցման հեղինակ: Նա 2005 թվականից է հանդես գալիս կատալոնացիների գլխավոր թիմում: