Ավելի քան 6 մլրդ դրամ՝ հանրային կառավարման բարեփոխումների ռազմավարության 2 տարվա գործունեության համար
Իրավական ակտերի նախագծերի հրապարակման միասնական կայքում երեկ տեղադրվել էր «Հանրային կառավարման բարեփոխումների մինչև 2030թ. ռազմավարության» նախագիծը:
Փոխվարչապետ Տիգրան Ավինյանի գրասենյակի կողմից հեղինակած այս նախագծով, ինչպես նախագծի բնութագրման մեջ է նշված, փորձ է արվում «ձևակերպել երկրի պետական կառավարման համակարգի վերափոխման ու արդիականացման համապարփակ օրակարգը՝ նախանշելով ապագայի պետության կառուցման ռազմավարական ուղեծիրը, առաջնահերթությունները և դրան հասնելու քաղաքականության փուլային օրակարգը»:
«Ռազմավարության մշակման համար առանցքային նշանակություն են ունեցել 2020 թվականին երկրին պատուհասած ճգնաժամերի՝ կորոնավիրուսի համավարակի և Արցախի Հանրապետության նկատմամբ Ադրբեջանի Հանրապետության կողմից սեպտեմբերի 27-ից սանձազերծած պատերազմի ընթացքում պետական կառավարման համակարգում դրսևորված լրջագույն մարտահրավերներն ու խորքային խնդիրների հետ առերեսումը»,- նշված է նախագծի բնութագրումներում:
Ըստ հեղինակների՝ այս ծրագրի մշակման անհրաժեշտությունը առաջացել է կառավարման ցածր արդյունավետությունից, ինստիտուցիոնալ ոչ բավարար կարողություններից, քաղաքականության մշակման և իրականացման համակարգի անարդյունավետությունից, հանրությանը պետության կողմից տրամադրվող ծառայությունների մատուցման անբավարար որակից ու արդյունավետությունից և հանրային ծառայության համակարգի անկատարությունից:
Որպես նախագծի մշակման անհրաժեշտություն՝ հիշատակված է նաև ԵՄ-Հայաստան համապարփակ և ընդլայնված գործընկերության համաձայնագրի 4-րդ՝ «Ներքին բարեփոխումները» հոդվածը:
«Հանրային կառավարման բարեփոխումների ռազմավարության ընդունումը նաև ԵՄ «Աջակցություն Հայաստանի հանրային կառավարման բարեփոխումների իրականացմանը» ֆինանսական համաձայնագրի ընդհանուր պայմաններից է»,- նշված է նախագծում:
Առաջին փուլով ներկայացված է Հանրային կառավարման բարեփոխումների (ՀԿԲ) ռազմավարության 2021-2023թթ. ճանապարհային քարտեզն ու արդյունքների շրջանակը: 5 տիրույթներով՝ քաղաքականություն, ծառայություններ, մարդիկ, ինստիտուտներ և ռազմավարության կառավարում, ներկայացված քայլերով նախագծի հեղինակները նպատակ ունեն հասնել գերազանց ծառայություններ մատուցող և առաջադեմ ժողովրդավարական գործելակերպով արդյունավետ հանրային կառավարման՝ ի նպաստ հանրային բարեկեցության աճի:
Մասնավորապես, ինչպես նշված է նախագծում, ակնկալվում է ունենալ՝
- ռազմավարական պլանավորման և քաղաքականության իրականացման իրատեսական, արդյունավետ, կանխատեսելի և հաշվետու համակարգի կայացում
- քաղաքացիակենտրոն, հասանելի, արդիական տեխնոլոգիական հենքով պետական և համայնքային ծառայությունների մատուցում
- արհեստավարժ, հանրային շահի գիտակցմամբ, արժանապատիվ վարձատրությամբ՝ քաղաքական ուժերի հարաբերակցության փոփոխությունից անկախ հանրային ծառայության կայացում
- արդյունավետ պետական ինստիտուտների կայացում՝ «առավելագույն արժեք՝ փողի դիմաց» սկզբունքով
- պետական համակարգում որակյալ մարդկային կապիտալի ձևավորման և պահպանման համար անհրաժեշտ կարողությունների զարգացման ինքնաբավ համակարգի կայացում
- տեխնոլոգիատար և նորարար պետական կառավարման համակարգի կայացում
ռեսուրսարդյունավետ և կայուն հանրային կառավարում:
2021-2023թթ. ընթացքում նախատեսած ծրագրերը կյանքի կոչելու համար ընդհանուր առմամբ անհրաժեշտ է 6 մլրդ 190 մլն 500 հազար դրամ: