Վազգեն Մանուկյանի խափանման միջոցը չվերացվեց
Երևանք քաղաքի ընդհանուր իրավասության դատարանը՝ դատավոր Վահե Միսակյանի նախագահությամբ, մերժեց Հայաստանի Երրորդ Հանրապետության առաջին վարչապետ Վազգեն Մանուկյանի պաշտպանների՝ Մանուկյանի նկատմամբ կիրառված խափանման միջոց ստորագրությունը՝ երկրից չբացակայելու մասին, վերացնելու միջնորդությունը:
Պաշտպանական կողմի ներկայացուցիչները միջնորդությունը ներկայացնելիս հայտնել էին, որ Վազգեն Մանուկյանը թե՛ նախաքննության փուլում, թե՛ դրա ավարտից հետո դրսևորել է պատշաճ վարքագիծ, հետևաբար՝ չկան նրա նկատմամբ խափանման միջոց կիրառելու հիմքեր:
Մեղադրող դատախազն էլ նշել էր, թե չեն վերացել խափանման միջոցը կիրառելու ժամանակ առկա հիմքերը, ու առարկել էր ներկայացված միջնորդությանը:
Հիշեցնենք, որ Վազգեն Մանուկյանին մեղադրանք է առաջադրվել՝ ՀՀ քրեական օրենսգրքի 301-րդ հոդվածով (իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը) և որպես խափանման միջոց է կիրառվել ստորագրություն՝ չհեռանալու մասին: 2021թ. մարտի 9-ին Վազգեն Մանուկյանին առաջադրված մեղադրանքը լրացվել է՝ 2021թ. փետրվարի 26-ին Բաղրամյան պողոտայում անցկացված հանրահավաքի ժամանակ նրա կողմից հնչեցված կոչերով, որոնք ևս պարունակում են իշխանությունը զավթելու և սահմանադրական կարգը տապալելու բռնի կոչեր: