Արտարժույթ բերող կազմակերպության հանդեպ այսպիսի վերաբերմունքը ևս մեկ ռումբ է, որ տեղադրում են տնտեսության տակ. Սարգսյան
Տնտեսվարողների և խոշոր ներդրողների մոտ կարող է խուճապային իրավիճակ ստեղծվել՝ տեսնելով Զանգեզուրի պղնձամոլիբդենային կոմբինատի շուրջ իրականացվող գործընթացները։ «Փաստինֆո»-ի հետ զրույցի ժամանակ ասաց Աուդիտորների պալատի նախագահ Նաիրի Սարգսյանը։
Նրա խոսքով՝ երբ իշխանության, կառավարության և նրանց կատարած գործողությունների հանդեպ վստահությունը նվազում է, տնտեսվարողներն արդեն զգուշավորություն են դրսևորում և մեծամասնության մոտ առաջանում է կապիտալը փոխելու տրամադրվածություն։ Չնայած հանքարդյունաբերությունն այնպիսի ոլորտ է, որը կոնկրետ երկրի, տարածքի հետ է կապված, բայց այն տնտեսվարողը, որի բիզնեսը կարելի է նաև այլ երկրում իրականացնել, կվախենա, որ մի օր էլ հնարավոր է ինքն այս կարգավիճակում հայտնվի և կտեղափոխի կապիտալը։
«Այն ներդրողները, որոնց համար Հայաստանը կարող էր հետաքրքրություն ներկայացնել, նմանատիպ երևույթներ տեսնելով, միանշանակ կմոռանան Հայաստանում ներդրումներ իրականացնելու մասին։ Մամուլից տեղեկացել եմ, որ արտահանման հետ կապված խոչընդոտներ են ստեղծվել։ Ակնհայտ է, որ որոշակի հետապնդում է իրականացվում։ Դեռևս որևէ պատճառ չի ներկայացվում, թե ինչի համար են այս գործողությունները, խուզարկության համար ինչ շարժառիթ կա կամ տնտեսական ինչ հանցագործություններ, ենթադրյալ խախտումներ է իրականացրել»,-նշեց Նաիրի Սարգսյանը։
Զանգեզուրի պղնձամոլիբդենային կոմբինատում իրականացվող խուզարկությունները Ն. Սարգսյանի կարծիքով միանշանակ բացասաբար կազդեն ներդրումների, բիզնես դաշտի վրա։ Սա երկրի տնտեսությանը հարված է լինելու։ Կարևոր խնդիր է նաև արտարժույթի հարցը։ Նաիրի Սարգսյանը նշում է, որ Զանգեզուրի պղնձամոլիբդենային կոմբինատը Հայաստան արտարժույթ բերող ամենալուրջ կազմակերպություններից մեկն է. «Այնքան արտարժույթ էր դրսից բերում Հայաստան, որ հավասարակշռում էր, դաշտում որոշակի չափով դրամի ամրապնդման վրա ազդեցություն էր թողնում։ Այս իրավիճակում, երբ ընդհանուր արտահանումները լավ վիճակում չեն գտնվում, ներմուծվող ապրանքների գնաճ է տեղի ունեցել, տրանսֆերտներն անցած տարվա համեմատ մի քիչ աճել են, բայց այն ծավալի չեն, ինչ 2019թ.-ին, նույնը տուրիզմը։ Այս իրավիճակում մի հատ էլ երկիր արտարժույթ բերող կազմակերպության հանդեպ այսպիսի վերաբերմունքը ևս մեկ ռումբ է, որ տեղադրում են տնտեսության տակ»,-նշեց Նաիրի Սարգսյանը։
Բացի այդ՝ Զանգեզուրի պղնձամոլիբդենային կոմբինատը միշտ խոշոր հարկատուների հնգյակի մեջ է լինում, հետևաբար պետբյուջե վճարվող հարկերի շեշտակի նվազում կարող է լինել։ Նաիրի Սարգսյանը նկատեց՝ այս պահին հետևանքներն անկանխատեսելի են, քանի որ այդ ամենը կախված է նաև նրանից, թե այս գործողության արդյունքում ինչ որոշում կկայացնեն սեփականատերերը։
Հարցին՝ հնարավո՞ր է գործողությունը դադարեցնելու որոշում կայացվի, Նաիրի Սարգսյանն ասաց. «Այդ մասով կանխատեսում չանենք, բայց հնարավոր է։ Ոչինչ պետք չէ բացառել։ Հնարավոր է նաև արդյունահանման ծավալների էական կրճատում։ Մյուս հավանական սցենարն էլ այն կլինի, որ օրինակ այդ ապօրինի գործողությունները բողոքարկվի Եվրոպական դատարանում, և տուգանքներ մուծվեն արդեն մեր հարկատուի հաշվին։ Սա ևս ժողովրդին է հարված լինելու»,-հավելեց Նաիրի Սարգսյանը։
Նշենք, որ վաղ առավոտից Զանգեզուրի պղնձամոլիբդենային կոմբինատում խուզարկություն են իրականացնում, համակարգիչներ են առգրավվել: Բերման է ենթարկվել անվտանգության դեպարտամենտի ղեկավարը։