Արթուր Վանեցյանը բացատրել է, թե ինչ է նկատի ունեցել՝ «Крым наш» ասելով
Այսօր «Ազատություն» ռադիոկայանի լրագրողը «Պատիվ ունեմ» դաշինքի ղեկավար Արթուր Վանեցյանին հարց ուղղեց՝ Վլադիմիր Սոլովյովի հետ հայտնի հարցազրույցում իր՝ «Я чекист» և «Крым наш» արտահայտությունների վերաբերյալ։ Ավելի կոնկրետ՝ ու՞մ են ուղղված դրանք և ի՞նչ նպատակ են հետապնդում։
Արթուր Վանեցյան․ «Крым наш ասելով, եթե բառացիորեն ենք թարգմանում, ասել եմ, որ Ղրիմը հայկական է։ Կարո՞ղ էի ես տենց բան ասել, իհարկե՝ ոչ։ Ի՞նչ եմ ես ասել․ դա եղել է մի պատասխան, որն ունի շարունակություն, այն հետևյալն է՝ ժողովուրդների ինքնորոշման իրավունքն անքակտելի է։ Եվ ես զուգահեռներ եմ անցկացրել արցախյան հակամարտության հիմնահարցի հետ։ Եվ ասել եմ, որ եթե Ղրիմի բնակչության 95 տոկոսից ավելին իր ազատ կամարտահայտության միջոցով ցանկություն է հայտնել միանալու ՌԴ-ին, ապա այդ իրավունքը պետք է հարգվի։ Եվ պետք է հարգվի նաև ՀՀ-ի ու հայ ժողովրդի կողմից։ Ինչո՞ւ, որովհետև մենք ունենք արցախյան հակամարտության հարց, որտեղանկյունաքարային է ժողովրդի ինքնորոշման իրավունքի իրացումը։ Կա՞ որևէ հայ, որը համաձայն չէ այդ պնդման հետ»։
Այսինքն՝ սա ազգերի ինքնորոշման սկզբունքի հարցն օրակարգ բերելու միջոց է եղել։ Ինչ վերաբերում է «Я чекист» արտահայտությանը, սա, ըստ Վանեցյանի, հատուկ ծառայություններում ընդունված խոսույթ է՝ խոսակցական բառապաշար։
«Ես առիթ ունեցել եմ դեռևս ԱԱԾ տնօրեն եղած ժամանակ պատասխանելու քաղհասարակության ներկայացուցիչներից մեկին և ասել եմ, որ ՀՀ ազգային անվտանգության ծառայությունն իրեն չի համարում նախկին «ԿԳԲ»-ի իրավահաջորդը։
Այդ էջը մեր համար փակ է»,- ամփոփեց Վանեցյանը։
Եվ ևս մի ամփոփում՝ ՀՀ ԱԱԾ-ն այն մարմինն է, որը պետք է սպասարկի բացառապես Հայաստանի Հանրապետության շահերը՝ անկախ նրանից՝ ՌԴ-ն մեր դաշնակիցն է, թե ոչ, կամ այլ պետություններ մեզ հետ ինչ հարաբերություններ ունեն։