Թբիլիսին պատրաստ է աշխատել Վրաստան-Ադրբեջան-Հայաստան եռյակի ձեւաչափում. Զալկալիանի
Թբիլիսին պատրաստ է աշխատել Վրաստան-Ադրբեջան-Հայաստան եռյակի ձեւաչափում աշխարհաքաղաքական կարեւոր ենթակառուցվածքային նախագծեր իրագործելու նպատակով: Այդ մասին հայտարարել է Վրաստանի փոխվարչապետ, ԱԳ նախարար Դավիդ Զալկալիանին Անթալյայում (Թուրքիա) Դիվանագիտական ֆորումին ելույթ ունենալիս:
Որպես տարածաշրջանային համագործակցության առավել հաջողված օրինակներ՝ Զալկալիանին ներկայացրել է մի շարք նախագծեր, որոնք իրականացվում են Ադրբեջանի, Վրաստանի եւ Թուրքիայի կողմից՝ Հարավային գազատրանսպորտային միջանցքը, Բաքու-Թբիլիսի-Կարս երկաթուղին եւ այլն: «Մենք այսօր շատ մեծ հնարավորություններ ունենք: Փաստը, որ նավթի եւ գազի խողովակներն անցնում են վրացական տարածքով, պրագմատիկ համագործակցության ցուցանիշ է: Կայունությունը կարեւոր է տարածաշրջանի զարգացման համար»,-ասել է նախարարը:
Ընդ որում՝ նա նշել է, որ Ադրբեջանն ու Թուրքիան Վրաստանի ռազմավարական դաշնակիցներն են, ինչպես նաեւ ընդգծել է Հայաստանի հետ պատմական եւ բարեկամական կապերը, հաղորդում է Նովոստի-Գրուզիա-ն:
«Դա մեր գործնական համագործակցության գործնական ցուցադրումն է: Հենց այդ պատճառով էլ մենք ցանկանում ենք այդ ուղերձը հասցնել մեր բոլոր հարեւաններին եւ, հատկապես, մեր հայ գործընկերներին: Մենք պատրաստ ենք աշխատել Վրաստան-Ադրբեջան-Հայաստան եռյակի ձեւաչափում տարածաշրջանային համագործակցության տեսանկյունից»,-հայտարարել է Զալկալիանին:
Նա եւս մեկ անգամ ընդգծել է, որ տարածաշրջանային համագործակցության ամրապնդումը Վրաստանի համար բացարձակ առաջնահերթություն է: Զալկալիանին նաեւ նշել է, որ կարեւոր է իրագործել կոնկրետ նախագծեր, որոնք պետք է նպաստեն տնտեսական համագործակցության, տրանսպորտային կապերի ընդլայնմանը Կասպից եւ Սեւ ծովերի ներուժն օգտագործելու տեսանկյունից: Ընդ որում՝ Վրաստանի վարչապետը պարզաբանել է, որ նշված ձեւաչափը նաեւ ենթադրում է ներգրավել ԱՄՆ-ին, Եվրամիությանը, Թուրքիային եւ այլ «խոշոր խաղացողներին», որոնք պատրաստ են օգնել վերոնշյալ նախագծերի զարգացման հարցում:
«Անհնար է ստեղծել տարածաշրջանում կայուն միջավայր առանց կարեւոր նախագծերի իրագործման եւ կապերի ամրապնդման: Իսկ առանց կայունության հնարավոր չի լինի խոսել զարգացման եւ բարգավաճման մասին: Այսպիսով՝ մեր կողմից մենք գիտակցել ենք, որ պետք է ակտիվորեն աշխատել՝ անգամ չնայած մեր սահմանափակ ռեսուրսներին: Դրա համար լավ օրինակ է հումանիտար համագործակցությունը, որը ձեռք է բերվել Հայաստանի եւ Ադրբեջանի միջեւ Վրաստանի վարչապետի եւ մեր ամերիկյան գործընկերների աջակցությամբ, որը նախատեսում է գերեւարվածների ազատում ականապատ տարածքների քարտեզների փոխարեն, ինչը նաեւ ցույց է տալիս, որ Վրաստանը կարող է անել ավելին: Ես համարում եմ, որ դա այդ գործընթացի լավ սկիզբ է»,-ասել է նախարարը: