Էրդողանը մաֆիոզի սկանդալային մեղադրանքներում «Թուրքիայի դեմ դավադրություն» է տեսել
Թուրքիայի նախագահ Ռեջեփ Թայիփ Էրդողանը փախուստի մեջ գտնվող մաֆիոզների կողմից իր շրջապատին առաջադրված մեղադրանքները «երկրի դեմ դավադրություններ» է անվանել, հայտնում է AP-ն:
Վերջին շաբաթների ընթացքում սոցցանցերում տեղադրված մի շարք տեսանյութերում մաֆիոզ Սեդաթ Պեկերը ցնցող մեղադրանքներ է առաջադրել իշխող կուսակցության անդամների դեմ, ներառյալ՝ կոռուպցիան, թմրանյութերի ապօրինի շրջանառությունն ու սպանությունների քողարկումը եւ բռնաբարությունը:
Պեկերը, որը, ինչպես ենթադրվում է, ներկայումս բնակվում է Դուբայում, իր պնդումները հաստատելու համար նա դեռ փաստաթղթային ապացույցներ չի ներկայացրել:
Նրա մեղադրանքներն ուղղված են ՆԳ նախարար Սուլեյման Սոյլուին, նախկին վարչապետ Բինալի Յըլդըրըմի որդուն, դատապարտված նախկին ՆԳ նախարարին, ինչպես նաեւ նրա որդուն, որը Էրդողանի իշխող կուսակցության պատգամավոր է:
YouTube-ում տեղադրված տեսանյութերը, որոնք միլիոնավոր դիտումներ են հավաքել, Սոյլուի հրաժարականի եւ Պեկերի ասածների հետաքննության պահանջով ընդդիմության կոչերի պատճառ են դարձել:
Խախտելով մեղադրանքների վերաբերյալ մեկ շաբաթվա լռությունը՝ Էրդողանը դրանք անվանել է «ստոր գործողություն»՝ ուղղված «երկրի ու իր իշխանության դեմ»:
«Ոչ ոք չպետք է կասկածի, որ մենք կտապալենք այդ ստոր գործողությունը»,- ասել է Էրդողանը իր իշխող կուսակցության անդամներին ուղղված ուղերձում: «Մենք հետապնդում ենք հանցավոր խմբավորումների անդամներին, ուր էլ որ նրանք փախչեն: Մենք այդ հանցագործներին հանգիստ չենք թողնի, քանի դեռ նրանց չենք վերադարձրել մեր երկիր ու չենք հանձնել դատական իշխանություններին»,- ասել է նա:
Իր վերջին տեսանյութում 49-ամյա քրեական հեղինակությունը պնդում է, որ Յըլդըրըմի որդին՝ Էրքամ Յըլդըրըմը, ժամանել է Վենեսուելա՝ թմրանյութերի մաքսանենգության հնարավոր ուղիները բացահայտելու համար: Բինալի Յըլդըրըմը կտրականապես հերքել է այդ մեղադրանքը՝ պնդելով, որ իր որդին, ով նավագնացության ընկերություն ունի, մարդասիրական առաքելությամբ է մեկնել Կարակաս՝ COVID-19-ի թեստերի հավաքածուներ ու դիմակներ բաժանելու համար:
Պեկերը նաեւ պնդում է, որ սերտ հարաբերությունների մեջ է եղել ՆԳ նախարար Սոյլուի հետ, որը իրեն թիկնապահներ է տրամադրել եւ նախազգուշացրել է իր խմբավորման գործունեության հետաքննության մասին: Պեկերը պնդում է նաեւ, որ Սոյլուն դիմել է իրեն` իշխող կուսակցության ներսում Էրդողանի փեսայի կողմից ղեկավարվող մրցակից խմբին հաղթելու համար օգնության խնդրանքով: Սոյլուն հեռուստատեսային հարցազրույցում հերքել է այս պնդումները եւ քրեական գործ է հարուցել Պեկերի դեմ:
Չորեքշաբթի օրը Էրդողանը հայտարարել է, որ ինքը վճռականորեն աջակցում է Սոյլուին եւ Յըլդըրըմին:
Պեկերի մյուս մեղադրանքները վերաբերում են ՆԳ նախկին նախարար Մեհմեդ Ագարին եւ նրա որդուն՝ իշխող «Արդարություն եւ զարգացում» կուսակցության պատգամավոր Թոլգա Ագարին: Պեկերը պնդում է, որ Թոլգա Ագարը մասնակից է լրագրողության ֆակուլտետի ղազախ ուսանողուհի Յելդանա Կախարմանի կասկածելի մահվանը, որը հարցազրույց էր վերցրել իրենից, եւ որի մահը ներկայացվել է որպես ինքնասպանություն բռնաբարությունից հետո: Օրենսդիրը հերքում է առաջադրված մեղադրանքը: Մաֆիոզները պնդում են, որ Մեհմեդ Ագարը կանգնած է 1990-ականների քաղաքական սպանությունների հետեւում:
Կարծիք կա, որ Պեկերը անցյալ տարի փախել է Թուրքիայից այ բանից հետո, երբ իմացել է իր խմբավորման դեմ պատրաստվող գործողության մասին։
Անհասկանալի է, թե ինչու է մաֆիայի ղեկավարը, որը սատարում էր Էրդողանին՝ նրա օգտին քաղաքական հանրահավաքներ կազմակերպելով եւ հակառակորդներին սպառնալով, կառավարության դեմ հանդես եկել:
Պեկերը պնդում է, որ ինքը ստիպված է այդ ամենի մասին բարձրաձայնել այն բանից հետո, երբ իր տանն իրականացրած ոստիկանական խուզարկության ժամանակ կինն ու երկու դուստրերը դաժան վերաբերմունքի են արժանացել: