Ծեծկռտուք ու հայհոյանքներ՝ «ՔՊ»-ականների միջև
AntiFake.am-ի տեղեկություններով՝ քիչ առաջ ծեծկռտուք է տեղի ունեցել «Քաղաքացիական պայմանագիր» կուսակցության գլխամասային գրասենյակում կուսակցականների միջև։ Աղբյուրը հայտնում է, որ նախ ԵԿՄ նախագահ Սասուն Միքայելյանն ու ՏԿԵՆ Սուրեն Պապիկյանը լարված խոսակցություն են ունեցել, այնուհետև գրասենյակի տարածքում քննարկումը վերածվել է ծեծկռտուքի՝ ուղեկցվելով բարձր հայհոյանքներով։ Միջադեպին մասնակցել են Սասուն Միքայելյանը, Սուրեն Պապիկյանը, իմքայլական պատգամավոր, Նիկոլ Փաշինյանի աներձագ Հրաչյա Հակոբյանը և այլ «ՔՊ»-ականներ, ովքեր հավաքվել էին գրասենյակում քննարկումների համար։
Սուրեն Պապիկյանը քաշքշելով գրասենյակի տարածքից հեռացրել է ծեծկռտուքի մասնակիցներից մեկին։ Այժմ իրավիճակը հանդարտվել է։
Antifake. am-ը պարզաբանումներ ստանալու համար փորձել ենք կապվել Սուրեն Պապիկյանի և «ՔՊ» կուսակցության մամուլի քարտուղար Վահագն Ալեքսանյանի հետ, սակայն երկուսն էլ զանգերն անպատասխան թողեցին։
***
Yerevan.Today-ն իր հերթին գրում է, որ իրենց հասել է տեղեկություն, որ այսօր երեկոյան՝ 19։00-ի սահմաններում, տհաճ միջադեպ է եղել Փաշինյանի ղեկավարած «Քաղաքացիական պայմանագիր» կուսակցության գրասենյակում։
Կուսակցական աղբյուրի խոսքով, այսօր ԱԺ ից բոլոր իշխանական պատգամավորները մեկ մարդու պես իջել են կուսակցության գրասենյակ՝ Տարածքային կառավարման նախարար ու ըստ ամենայնի՝ ՔՊ շտաբի պետ Սուրեն Պապիկյանի հետ նախընտրական թեմատիկ քննարկումների։ Ի դեպ, միջադեպի կողմերից մեկը հենց Պապիկյանն է եղել՝ վարչապետի աներորդի Հրաչ Հակբյանի հետ միասին։
Վեճը ծագել է այն բանից հետո, երբ «աքլորացել է» մի երիտասարդ ՔՊական։ Նրա հետ չստացված զրույցի մյուս կողմը, ասում են, ԵԿՄ նախագահ, պատգամավոր Սասուն Միքայելյանն է եղել։
«Խոսույթի թեման այնքան է հունից հանել Սասուն Միքայելյանին, որ նա պայթել է, գոռգոռոցով հայհոյանքներ է հնչեցրել, ընդհուպ քաշքշուկ է եղել կուսակցական կանանց ներկայությամբ և իրար դուրս են բերել միջանցք»,-աչքի տեսածն է պատմում աղբյուրը ՝ նշելով, հայհոյանքներով լեզվին զոռ էին տվել նաև ուրիշ տղամարդիկ, բայց դա կարճ տևեց Սուրեն Պապիկյանի միջամտությամբ։ Նա անմիջապես իրավիճակի վերահսկողությունը ձեռքն է առել ու աներձագ Հրաչի հետ միասին քաշքշելով՝ մեկ այլ սենյակ ուղեկցել Սասուն Միքայելյանին բորբոքած կուսակցին։
Ինչի՞ց է այդպես բորբոքվել Սասուն Միքայլյանը և այդ ի՞նչն է ստիպել նրան հախուռն արձագանքել երիտասարդին, ով, ըստ ամենայնի, բոլորից մեկն է եղել, ով այդ պահին գտնվել է ՔՊ կենտրոնական գրասենյակում՝ ընտրություններին իշխանությանը ձայներ բերելու թեմատիկ ժողովի մասնակցելու համար, մեզ հետաքրքրող որևէ հարցի Սասուն Միքայելյանը չցանկացավ պատասխանել։ Սկզբում փորձում էր հերքել միջադեպի մասին լուրը, թե՝ «Ես ճանապարհին եմ, տուն եմ գնում», իսկ երբ ավելի կոնկրետ դրվագներով հարցերը հնչեցրինք՝ ստիպված անջատեց հեռախոսը։ Ի դեպ, Yerevan.Today-ի մեկ այլ աղբյուր հայտնեց, որ «կռիվ հրահրածը» ցանկացել է հայտնվել ՔՊ ցուցակում։ Բայց այդ գաղափարին, ըստ ամենայնի, դեմ է եղել Սասուն Միքայելյանը։