ՔԿ աշխատակցին աշխատանքից ազատել են ընդդիմադիր հավաքներին մասնակցելու եւ Փաշինյանին քննադատելու համար
Երեկ իր սոցիալական էջում ՔԿ աշխատակից Հակոբ Հակոբյանը հրապարակել էր իր աշխատանքից ազատման դիմումը: Tert.am-ի հետ զրույցում նա մանրամասնում է, թե որն էր աշխատանքից ազատման պատճառը և ինչ արձագանք ստացավ այդ որոշումը՝ նշելով, որ այդ ցանկությունն իր մոտ առաջացել էր դեռ 2020 թվականի նոյեմբերի 10-ին ստորագրված կապիտուլյացիոն ակտի ստորագրումից հետո:
- Ձեր հրաժարականի դիմումը հետաքրքիր էր սկսվում, որը հրապարակել էիք Ձեր սոցիալական էջում, նշելով, որ լինելով ՀՅԴ անդամ աշխատանքը հայրենադավների հետ անընդունելի եմ համարում, որի պատճառով Քննչական կոմիտեի գլխավոր քարտուղարին ներկայացրել եմ ազատման դիմում:
- Ես ուսանողական տարիներից անդամակցել եմ Հայ Յեղափոխական Դաշնակցությանը և կարելի է ասել , որ Դաշնակցության Հայաստան մուտք գործելու ամենասկզբից, սակայն, երբ իրավապահ համակարգ էի մտնում 1999 թվականին, համապատասխան դիմում ներկայացրի Դատախազության գրասենյակ և կասեցրի անդամակցությունս և իրավապահ համակարգում տեղյակ էին, որ ես Դաշնակցության հայացքներ կրող անձնավորություն եմ, սակայն իմ անդամակցությունը սառեցված է, այսինքն՝ ես նկատի եմ ունեցել, որ Դաշնակցության գաղափարախոսությունը կրող անդամ եմ, սակայն իմ անդամությունը սառեցված է: Հետագայում իրավապահ մարմինների աշխատակիցներն էին պարզել, որ կասեցված է իմ անդամակցությունը:
- Հետագայում, ե՞րբ, հիմա՞, ի՞նչն էր առիթ տվել նրանց, դա ուսումնասիրելու:
- Այո, հիմա: 2020 թվականի նոյեմբերի 10-ին խայտառակ, չարաբաստիկ հայտարարության ստորագրելուց հետո, քանիցս ես մտադրություն եմ ունեցել աշխատանքից ազատման դիմում գրել, սակայն ընկերների և հարազատների խորհրդով հետաձգում էի ու մտածում՝ րոպե առաջ սրանք կհեռանան, կամ կհեռացվեն, սակայն ինչպես նկատում ենք՝ պատմական բոլոր օրինաչափությունները չեն գործում, և սրանք դեռևս շարունակում են կառչած մնալ իրենց աթոռից, և յուրաքանչուր օր ականատես ենք լինում նոր հակահայ իրողությունների, և՛ բանակը, և՛ իրավապահ համակարգը, փոխանակ համարժեք արձագանքելու գործողություններին՝ լծվել էին վարչապետից կառչած անձի քմահաճույքները կատարելուն, և ինչպես ասում են՝ շաբաթն ավելի շուտ եկավ, քան՝ ուրբաթը, և Քննչական կոմիտեի համապատասխան ծառայողն ինձ կանչեց և ասաց՝ կատարվել է դիտարկում և դիտարկման արդյունքում պարզել են՝ ես ունեմ ընդդիմադիր կեցվածք, մասնակցել եմ ընդդիմադիր հավաքներին, հանդիսանում եմ Հայ Յեղափոխական Դաշնակցության անդամ և այդ ժամանակ ինձ ասացին՝ ճշտել են, որ անդամ եմ, բայց կասեցված անդամ: Իմ անձնական էջում կիսվել եմ Հայ Հեղափոխական Դաշնակցության և «Հանուն հայրենիքի փրկության» շարժման հրապարակումներով, քննադատել եմ վարչապետի աթոռից կառչած անձին, քննադատել եմ նրա աշխատակազմի գործունեությունը, և ունեմ հայացքներ, որը վերևների սրտով չէ: Դրանից հետո ես դիմում գրեցի և իմ դիմումը հենց նույն օրը հաստատեցին:
- Դուք մասնակցել եք նոյեմբերի 10-ից հետո իրականացվող ակցիաներին, Ձեր դեմքը լուսանկարել են մեկ այլ համապատասխան կառույցի ներկայացուցիչներ, հայտնել են Ձեր աշխատավայրի ղեկավարությանը: Հավաքվել է այս ամբողջը և հետևում են այդ մարմինները՝ ովքեր և ուր են գնում, ինչ են անում:
- Իրականացվում է տոտալ վերահսկում: Հատկապես իրավապահ մարմնի աշխատակիցները, պետական մարմինների կառավարման մարմինների աշխատակիցները:
- Դուք նշեցիք, որ Քննչական կոմիտեի համապատասխան պաշտոնյան Ձեզ կանչեց, Դուք չե՞ք հայտնելու՝ ով է այդ պաշտոնյան, թե կհայտնեք:
- Ես իրավունք չունեմ հայտնելու, և մեծ հաշվով նա կապ չուներ և մեծ հաշվով կարող էր ինքը չհայտնել, կամ ուրիշը: Ուղղակի նպատակահարմար գտան, որ հենց ինքը հայտնի այդ մասին, և կարծում եմ ՝ ամենաճիշտ տարբերակը դա էր: