Մինչեւ նոյեմբերի 1-ը Երեւանում կարելի է կեղտոտ մեքենաներով հաց եւ միս տեղափոխել
2017 թվականի նոյեմբերի 1-ից Երեւանում լիովին կարգելեն կեղտոտ ավտոմեքենաներով հացի ու մսի տեղափոխումը։ Այս մասին հուլիսի 28-ին լրագրողների հետ հանդիպման ժամանակ ասաց Գյուղատնտեսության նախարարության Սննդամթերքի անվտանգության պետական ծառայության սննդամթերքի վերահսկողության բաժնի պետ Վահե Դանիելյանը։
Ավելի վաղ կառավարության ընդունած որոշման համաձայն՝ հացամթերքն ու թարմ միսը կարելի կլինի տեղափոխել միայն անհրաժեշտ հարմարանքներ ունեցող ավտոմեքենաներով։ Սեպտեմբերի 1-ից պահանջն ուժի մեջ կմտնի պետական գնումների եւ հանրային սննդի մատակարարների համար, իսկ նոյեմբերի 1-ից ՝ ամենուր Երեւանում։ Հետագայում պահանջը կտարածվի նաեւ մարզերի վրա։
Պետական ծառայությունը հատկապես հետաքրքրվել է հացով ու մսով, քանի որ մյուս մթերքներն արդեն պատշաճ կերպով են տեղափոխում։ Այդ պարագայում ավտոմեքենաները պատկանում են հենց արտադրողներին, որոնք կարող են իրենց դա թույլ տալ։ Իսկ հացով ու մսով հիմնականում զբաղվում է փոքր բիզնեսը, որը նման գումարներ չունի։
Սակայն պաշտոնյայի խոսքով՝ ամենակարեւորը սպառողի առողջությունն է։ Եվ դժվար է պատկերացնել, թե ինչպես կարելի է առանց սառցախցիկների թեկուզ փոքր խմբաքանակով մսի տեղափոխում թույլ տալ։
«Ասենք, խորհրդային տարիներին խիստ սահմանափակում գոյություն ուներ՝ հացը կարելի էր տեղափոխել միայն փայտե արկղերով։ Այժմ ժամանակները փոխվել են. պոլիմերներ գոյություն ունեն։ Այդ պատճառով թույլ ենք տալիս նաեւ դրանք՝ դրանցից այնպիսինները, որոնք կարող են շփվել սննդի հետ։ Մենք նույնիսկ թույլ ենք տվել փոխադրման համար օգտագործել ոչ միայն հատուկ, այլեւ վերասարքավորված մեքենաներ։ Այսինքն՝ աշխատեցինք չճնշել բիզնեսը։ Բայց ազատութունն ազատություն, իսկ հացը ստվարաթղթե տուփերով կամ կամ միսը բեռնախցիկով չի կարելի տեղափոխել»,-նշեց Դանիելյանը։
Իսկ թե որքան կարժենան բիզնեսի համար նոր փոփոխությունները եւ արդյոք դրանց պատճառով հացն ու միսը կթանկանան, հայտնի չէ։ Նման հաշվարկներ չեն արվել։ Ավելին, դա պետական ծառայության գործառույթների մեջ չի մտնում։