Ընտանեկան մարզահամալիր. . Նեպտուն մարզահամալիր (տեսանյութ, լուսանկարներ)
2005 թվականին, երբ «Նեպտունը» նշեց իր հանդիսավոր բացումը, այն մայրաքաղաքի առաջին նման խոշոր մարզահամալիրներից մեկն էր: Այսօր էլ այն առանձնանում է իր ծառայությունների ծավալով ու որակով, առաջարկում մարզական ակտիվ պարապմունքներ անցկացնելու համար անհրաժեշտ լավագույն պայմանները: Այստեղ կարելի է մարզվել մարզասրահում, հաճախել լողի, կարատեի, պարի, յոգայի, ֆիթնեսի, շեյփինգի պարապմունքների:
Հայաստանում վերջին շրջանում զգալիորեն մեծացել է մարզասրահներ հաճախողների և կանոնավոր մարզվողների թիվը: Դա պայմանավորված է ժամանակակից կյանքի պահանջով: Մի կողմից նստակյաց աշխատանքի բնույթն ու առօրյան են ստիպում շատերին մկանային ստատիկ լարվածությունը վերացնելու համար պարբերաբար մարզվել, մյուս կողմից արտաքինին ներկայացվող ժամանակակից չափանիշներին համապատասխանելու ցանկությունն է մարդկանց մղում մարզասրահներ: «Նեպտուն» մարզահամալիրի մարզասրահը վերազինված է «MATRIX» և «LIFE FITNESS» ժամանակակից ու նոր մարզասարքերով: Վազքուղիներ ծրագրավորված են այնպես, որ յուրաքանչյուր մարզվողի համար ընտրվում է անհատական ծրագիր՝ ըստ բարդության, մարմնի զանգվածի, տևողության, ինչճի շնորհիվ մարզումներն էլ ավելի արդյունավետ են դառնում: Բացի այդ մարզվողը տեսնում է նաև այրվող կալորիաների քանակը, սրտի աշխատանքը և այլն: Վազքուղիներն ունեն նաև ինտերնետին միանալու հնարավորություն և վիրտուալ տեսահոլովակներ, որոնց շնորհիվ վազքուղու վրա անցկացրած ժամանակն աննկատ է անցնում: «Նեպտուն» մարզասրահի մարզիչները նաև անհատական սննդակարգ են մշակում՝ ինչպես մկանային զանգված լրացնելու, այնպես էլ նիհարելու համար՝ նշանակելով ճիշտ ու բալանսավորված սնունդ: «Նեպտուն» մարզասրահում գործում է կանանց համար առանձնացված մարզասրահ: Բոլոր մարզասրահներում գործում է օդափոխության բարձրակարգ համակարգ, ինչն էլ ավելի հարմարավետ է դարձնում պարապմունքները:
Իհարկե ժամանակակից քաղաքային մարդու կյանքն առանց լողավազանում անցկացվող մի քանի երանելի ժամերի անհնար է պատկերացնել: Այն օգնում է լիցաթափվել բացասական հույզերից, զգալի ջրի կենարար ուժը, լիցքավորվել դրական էներգիայով: Բայց լողի պարապմունքները «Նեպտուն» մարզահամալիրում իրականացվում են ոչ միայն սիրողական, այլև պրոֆեսիոնալ մակարդակում: Այստեղ պարապող երեխաներն ու պատանիները դառնում են պրոֆեսիոնալ լողորդներ, մասնակցում հանրապետական և միջազգային պրոֆեսիոնալ մրցաշարերի: Լավագույն արդյունքներ գրանցողները ներառվում Հայաստանի լողի պատանեկան հավաքականի կազմում: «Նեպտուն» մարզահամալիրում լողի պարապմունքները վարում է մարզչական ուժեղ պրոֆեսիոնալ թիմ՝ Հայաստանի լողի պատանեկան հավաքականի գլխավոր մարզիչ Արման Վահանյանի ղեկավարությամբ: Նրա նախկին սաներից Նարեկ Աթոյանն ինքն այսօր արդեն մարզիչ է: Նրա խոսքով իրենց նպատակն է դաստիարակել առողջ սերունդ և միջազգային մրցաշարերում հաջողություններ գրանցող լողորդներ:
«Նեպտունում» պրոֆեսիոնալ բարձրակարգ հիմքերի վրա են դրված նաև կարատեի պարապմունքները, որոնք անցկացնում են միջազգային ճանաչում ունեցող ունեցող տիտղոսակիր մարզիկներ Էմին Ղազարյանը՝ Եվրոպայի և Աշխարհի չեմպիոն, Րաֆֆի Թորոսյան՝ Աշխարհի չեմպիոն, Դավիթ Հակոբկոխվյանը՝ Եվրոպայի չեմպիոն: Նրանց սաների շարքում էլ արդեն կան տիտղոսակիներ ՝ Հայաստանի, Կովկասի և բազմաթիվ այլ մեդալակիրներ:
«Նեպտուն» մարզահամալիրում գործում է նաև պարի և սպորտային պարերի մասնագիտացված դպրոց: Ընդունելությունը 5 տարեկանից:
Ի դեպ «Նեպտունում» է գործում Երևանում իր տեսակի մեջ միակ միջազգային չափանիշներին համապատասխանող սպորտային պարերի բարձրակարգ դահլիճը: Այստեղ անցկացվում են պարային լայնամասշտաբ մրցույթներ: Դահլիճն ունի լուսային հատուկ էֆֆեկներ ու տեխնիկական հզոր հագեցվածություն, հանձնաժողովի համար հատկացված հանգստի սենյակ:
Իհարկե ժամանակակից ոչ մի մարզահամալիր չի կարող անտեսել ֆիթնեսի, շեյփինգի ու յոգայի պարապմունքների կազմակերպման անհրաժեշտությունը: Դրանք մեծ պահանջարկ ունեն կանանց ու աղջիկների շրջանում: «Նեպտուն» մարզահամալիրում այդ պարապմունքներն անցկացվում են ընդարձակ ու լուսավոր մարզադահլիճներում:
Ի դեպ «Նեպտուն» մարզահամալիրի բոլոր մարզասրահներին, դահլիճներին ու լողավազանին կից գործում են առանձնացված հանդերձարաններ, ցնցուղներ: Կան նաև VIP հանդերձաններ առանձին ցնցուղներով: Իսկ մարզասրահի հանդերձարանին կից գործում է նաև շոգեբաղնիք: Բոլոր հանդերձարաններն այստեղ վերանորոգվում են 2-3 տարին մեկ: Մարզահամալիրն ունի ընդարձակ ու հարմարավետ սպասասրահներ:
Այս մարզահամալիրը ընտանիքով այցելելու, մարզվելու և երեխաներին առողջ միջավայրում զարգացնելու համար նախատեսված անփոխարինելի վայր է: Այստեղ միշտ առաջարկվել են ծառայություններից օգտվելու հարմար պայմաններ՝ օրական, ամսական ու տարեկան վճարման հնարավորությամբ: «Նեպտուն» մարզահամալիրն իր գործունեության առաջին օրվանից եղել է մեծահասակների համար առողջ կենսակերպ վարելու, իսկ երեխաների ու պատանիների համար սպորտում ընդգրկվելու և հաջողություններ ունենալու հրաշալի հնարավորություն :
