Գիտնական. Եթե ՀՀ իշխանություններն ի վիճակի չեն հետեւություններ անել վերջին պատերազմից, ապա պետք է հեռանան
Պարոնայք պատգամավորներ Հայրապետյան (իշխող Իմ քայլ դաշինքի պատգամավոր Մխիթար Հայրապետյան` խմբ.) եվ Հովհաննիսյան (իշխող «Իմ քայլը» դաշինքի պատգամավոր Հովհաննես Հովհաննիսյան` խմբ.), եթե դուք չեք կարողանում ստիպել գործող իշխանություններին արմատապես ավելացնել ծախսերը գիտության կարիքների համար, ապա բոլորը պետք է հեռանան: Այս մասին փետրվարի 1-ին «Գիտությունը` որպես անվտանգության եւ զարգացման հենասյուն» թեմայով խորհրդարանական լսումների ժամանակ ասաց Ֆիզիկայի եւ մաթեմատիկայի դոկտոր Արթուր Իշխանյանը` դիմելով Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական խորհրդարանական հանձնաժողովի նախագահ Մխիթար Հայրապետյանին եւ շրջնակային խորհրդարանական հանձնաժողովի փոխնախագահ Հովհաննես Հովհաննիսյանին:
Ըստ նրա` այն իշխանությունները, որոնք երկրի համար այսպիսի աղետալի 44-օրյա պատերազմից հետո ի վիճակի չեն կրկնակի ծախսեր կատարել գիտության կարիքների համար, ի վիճակի չեն կոնկրետ դասեր քաղել տեղի ունեցածից, պետք է «արժանի հանգստի» գնան:
Նա նաեւ խոստովանեց, որ Հայաստանի անկախացումից ի վեր ինքն արդեն 15 կամ 20-րդ անգամ է մասնակցում նմանատիպ լսումների, սակայն ամեն անգամ ամեն ինչ ավարտվում էր ոչ թե կոնկրետ գործերով եւ առաջարկություններով, այլ` «առողջության համար կենացներով»:
«Այսինքն` այդպես էլ ոչինչ չի արվել: Հայաստանում բոլոր իշխանությունները վատ են վարվել գիտության հետ, սակայն ներկայիս կառավարությունն էլ ավելի վատ վարվեց: Փոփոխությունների համար պետք է սկսեք ինքներդ ձեզնից: Ցույց տվեք բոլորին, որ իսկապես ցանկանում եք ինչ-որ բան փոխել, այլ ոչ թե փորձեք թոզ փչել մեր աչքերին»,- շեշտեց Իշխանյանը:
Գիտնականի նման անսպասելի ելույթը, որը նույնիսկ ծափահարությունների արժանացավ, դուր չեկավ խորհրդարանական լսումների նախաձեռնող Մխիթար Հայրապետյանին:
Հայրապետյանը, մասնավորապես, հանդիպման մասնակիցներին կոչ արեց քաղաքական հայտարարություններով հանդես չգալ, այլ կոնկրետ լուծումներ առաջարկել ստեղծված իրավիճակից դուրս գալու համար: Ընդ որում, ինքը` պատգամավորը, որեւէ կոնկրետ օրինակ եւ առաջարկ չներկայացրեց: Այնուամենայնիվ, պատգամավորը նշեց, որ Իշխանյանի ելույթը կապ չունի այսօրվա քննարկումների թեմայի հետ, եւ ուստի նրա հայտարարությունները դուրս են գալիս կառուցողական երկխոսության շրջանակներից: