Քոչարյանի նախագահության շրջանում Ռուսաստանը զենք չի վաճառել Ադրբեջանին. Արամ Հարությունյան
Այսօր ինձ համար Նիկոլ Փաշինյանին պաշտպանող մարդն ավելի ճղճիմ է, քան Նիկոլ Փաշինյանը, լինի իմ ազգականը, թե բարեկամը։ Այս մասին այսօր՝ հունվարի 20-ին, մամուլի ասուլիսում հայտարարեց «Ազգային համաձայնություն» կուսակցության ղեկավար Արամ Հարությունյանը՝ նշելով, որ բոլորը, որոնք նպաստել են, որ Շուշին տան, պետք է դատվեն:
«Նիկոլ Փաշինյանը Ալիևի հետ պայմանավորվել էր: Սցենարն այնպիսին էր, որ մի քանի շրջանից հետո պետք է մտնեին խաղաղապահները, բայց դրան խանգարեց Էրդողանը, որին երբեք ձեռնտու չէր դա: Վերջում Պուտինը բռնեց Նիկոլի եւ Ալիեւի վզից եւ տարավ ամսի 9-ի հայտարարությունը ստորագրելու: Եթե մնար Նիկոլի եւ Ալիեւի վրա, լրիվ ուրիշ բան էր լինելու»,- ասաց նա:
Արամ Հարությունյանը անդրադարձավ Ռոբերտ Քոչարյանի նախագահության շրջանին՝ նշելով, որ այդ շրջանում Ռուսաստանը զենք չի վաճառել Ադրբեջանին. «Մենք այդ ժամանակ մի թիզ հող չենք տվել, երկիրը զարգացել է: Հիմա նույն բիզնեսմենները, որ կայացել են Քոչարյանի ժամանակ, լավ են ապրել Քոչարյանի ժամանակ: Քոչարյանը ինչքան բան է արել Գյումրիի համար, դատավարության ժամանակ Գյումրիի կեսը պետք է գար այդտեղ»: